15 January, 2016 12:26:03 PM
ഒമ്പതുകാരിയെ മൊബൈലിൽ അശ്ലീല ചിത്രം കാട്ടി പീഡനശ്രമം: ഓട്ടോക്കാരൻ പിടിയിൽ
ചാത്തന്നൂർ: നാലാം ക്ലാസുകാരിയെ മൊബൈലിൽ അശ്ലീല ചിത്രങ്ങൾ കാട്ടി പീഡിപ്പിക്കാൻ ശ്രമിച്ച ഓട്ടോ ഡ്രൈവറെ കൊട്ടിയം പൊലീസ് അറസ്റ്റ് ചെയ്തു. കൊട്ടിയം ജംഗ്ഷനിലെ ഓട്ടോ ഡ്രൈവറും വിമുക്തഭടനുമായ പ്രദീപിനെ (60) ആണ് കൊട്ടിയം സി. ഐ ജോഷ്വയുടെ നേതൃത്വത്തിൽ അറസ്റ്റ് ചെയ്തത്.
കുട്ടിയെ ദിവസവും ഓട്ടോറിക്ഷയിൽ സ്‌കൂളിൽ കൊണ്ടുവിടുന്നത് പ്രദീപായിരുന്നു. മറ്റ് കുട്ടികളെ ഇറക്കിവിട്ടശേഷം ഒൻപതുകാരിയെ മൊബൈലിൽ അശ്ളീല ദൃശ്യങ്ങൾ കാണിക്കുകയായിരുന്നു പതിവ്. പിന്നീട് ദേഹോപദ്രവത്തിലേക്കുകൂടി എത്തിയതോടെ കുട്ടി എതിർത്തു. ഇയാൾ പതിവ് തുടർന്നതോടെ കുട്ടി ഓട്ടോയിൽ പോകാൻ വൈമനസ്യം കാണിച്ചു. കുട്ടിയുടെ പെരുമാറ്റത്തിൽ മാറ്റം കണ്ടതോടെയാണ് രക്ഷാകർത്താക്കൾ വിവരം ആരാഞ്ഞത്.
ഓട്ടോക്കാരന്റെ മോശമായ പെരുമാറ്റം വ്യക്തമായതോടെ രക്ഷിതാക്കൾ കൊല്ലം ചൈൽഡ് വെൽഫെയർ കമ്മിറ്റിയ്ക്ക് പരാതി നൽകി. പരാതി ലഭിച്ചതിനെത്തുടർന്ന് കൊട്ടിയം പൊലീസിന് ചൈൽഡ് വെൽഫെയർ കമ്മിറ്റി ചെയർമാൻ സി.ജെ ആന്റണി പരാതി കൈമാറി. വിവരം അറിഞ്ഞ് ഒളിവിൽ പോയെങ്കിലും പൊലീസ് പിന്തുടർന്ന് പിടികൂടുകയായിരുന്നു. പ്രതിയെ ചോദ്യം ചെയ്തു വരികയാണ്.
