11 May, 2021 10:35:49 PM
ചൂണ്ടയിടുന്നതിനിടെ പൊലീസിനെ കണ്ട് കായലിൽ ചാടിയ ആൾ മരിച്ചു; സംഭവം കൊല്ലത്ത്
കൊല്ലം: ലോക്ക്ഡൗണിനിടെ പാലത്തിന് അടിയിൽ ഇരുന്ന് ചൂണ്ടയിടുന്നതിനിടെ പൊലീസിനെ കണ്ട് കായലിൽ ചാടിയ ആൾ മരിച്ചു. കൊല്ലം ബൈപാസിൽ നീരാവില്‍ പാലത്തിനു താഴെ ഇരുന്ന് ചൂണ്ടയിടുകയായിരുന്ന യുവാക്കള്‍ പൊലീസിനെ കണ്ടു കായലില്‍ ചാടുകയായിരുന്നു. ഇതിൽ ഒരാളാണ് മരിച്ചത്. നീരാവില്‍ സ്വദേശി പ്രവീൺ(41) എന്നയാളാണ് മരിച്ചത്.
ചൊവ്വാഴ്ച രാവിലെ 11 മണിയോടെയായിരുന്നു സംഭവം. ലോക്ക്ഡൗണ്‍ ദിവസങ്ങളില്‍ പാലത്തിനു താഴെ ചീട്ടുകളിയും ചുണ്ടയിടലും പതിവാണെന്നു പരാതി ഉണ്ടായിരുന്നു. ഇതേ തുടർന്നാണ് പൊലീസ് ഈ സ്ഥലത്തു പെട്രോളിങിന് എത്തിയത്. എന്നാൽ പൊലീസിനെ കണ്ടു യുവാക്കൾ കായലിലേക്ക് ചാടുകയായിരുന്നു. സംഘത്തിലുണ്ടായിരുന്ന മറ്റുള്ളവർ നീന്തിരക്ഷപെട്ടെങ്കിലും പ്രവീൺ ചുഴിയിൽപെടുകയായിരുന്നു. പ്രവീണിനെ കാണാതായതിനെ തുടർന്ന് പ്രദേശവാസികൾ കായലിൽ തെരച്ചിൽ നടത്തി പുറത്ത് എത്തിച്ചെങ്കിലും ജീവൻ രക്ഷിക്കാനായില്ല.
