23 August, 2023 09:22:54 AM
പാലക്കാട് ടൂറിസ്റ്റ് ബസ് മറിഞ്ഞ് രണ്ട് പേർ മരിച്ചു: നിരവധി യാത്രക്കാർക്ക് പരിക്ക്
പാലക്കാട്: ചെർപ്പുളശേരി തിരുവാഴിയോട് കാർഷിക വികസന ബാങ്കിന് സമീപം ടൂറിസ്റ്റ് ബസ് മറിഞ്ഞ് രണ്ട് പേർ മരിച്ചു. നിരവധി യാത്രക്കാർക്ക് പരിക്ക്. ബുധനാഴ്ച രാവിലെ 7.45നായിരുന്നു അപകടം. ഒരു സ്ത്രീയും പുരുഷനുമാണ് മരിച്ചതെന്ന് സ്ഥലം എംഎൽഎ കെ. പ്രേംകുമാർ വ്യക്തമാക്കി. എന്നാൽ ഇതിൽ ഔദ്യോഗിക സ്ഥിരീകരണം ലഭ്യമാ‌യിട്ടില്ല. നിയന്ത്രണം വിട്ട ബസ് ഇലക്ട്രിക് പോസ്റ്റിലിടിച്ച് മറിയുകയായിരുന്നു.
ചെന്നൈയിൽ നിന്നും കോഴിക്കോ‌ടിന് വരികയായിരുന്ന കല്ലട ബസാണ് അപകടത്തിൽപ്പെട്ടത്. രണ്ട് പേർക്ക് സാരമായി പരിക്കേറ്റതായാണ് വിവരം. ഇവരെ പാലക്കാട് ജില്ലാ ആശുപത്രിയിലേക്ക് മാറ്റി. അപകടസമയത്ത് ബസിൽ ജീവനക്കാരടക്കം 38 യാത്രക്കാരുണ്ടായിരുന്നു എന്നാണ് പ്രാഥമിക വിവരം.
