24 April, 2023 08:56:28 PM
ആലപ്പുഴയിൽ കാറിടിച്ച് അധ്യാപിക മരിച്ചു; രണ്ടു പേർക്ക് പരിക്ക്
ആലപ്പുഴ: നിയന്ത്രണംവിട്ട കാർ ഇരുചക്രവാഹനങ്ങളിൽ ഇടിച്ച് സ്കൂട്ടർ യാത്രക്കാരിയായ അധ്യാപിക തൽക്ഷണം മരിച്ചു. തുമ്പോളി മാതാ സീനിയർ ഹയർസെക്കൻഡറി സ്കൂളിലെ ഫിസിക്സ് അധ്യാപികയും ആലപ്പുഴ സനാതനപുരം കാർത്തികഭവനില്‍ അനിൽകുമാറിന്‍റെ ഭാര്യയുമായ മാലാ ശശിയാണ് (45) മരിച്ചത്.
അപകടത്തിൽ ബൈക്ക് യാത്രക്കാരായ ദമ്പതികൾക്കും പരിക്കേറ്റു. കൈനകരി പുത്തൻവിളയിൽ പഴയകരിച്ചിറ ബിനു (42), ഭാര്യ ദീപ്തി (40) എന്നിവർക്കാണ് പരിക്കേറ്റത്. ഇവരെ ആലപ്പുഴ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
ഇന്നു വൈകിട്ട് 3.35ന് ആലപ്പുഴ ബൈപാസ് കളർകോട് കുതിരപ്പന്തി ഭാഗത്തായിരുന്നു അപകടം. ആലപ്പുഴയിൽനിന്ന് എറണാകുളം ഭാഗത്തേക്ക് പോയ മഹാരാഷ്ട്ര രജിസ്ട്രേഷനിലുള്ള വാഗണർ കാറാണ് അപകടമുണ്ടാക്കിയത്.
അമിതവേഗത്തിൽ ബൈപാസിലൂടെ സഞ്ചരിച്ച കാർ ആദ്യം ദമ്പതികൾ സഞ്ചരിച്ച ബൈക്കിനെയാണ് ഇടിച്ചുതെറിപ്പിച്ചത്. പിന്നാലെ പാതയോരത്ത് സുരക്ഷക്കായി സ്ഥാപിച്ച കുറ്റിയിലേക്ക് കയറി നിയന്ത്രണംവിട്ട് മാലാ ശശി സഞ്ചരിച്ച സ്കൂട്ടറിൽ ഇടിക്കുകയായിരുന്നു.
