25 March, 2023 01:35:37 PM
വായ്പ മുടങ്ങി, ബാങ്ക് ജീവനക്കാർ ഭീഷണിപ്പെടുത്തി; ഗൃഹനാഥന്‍ ജീവനൊടുക്കി
ആലപ്പുഴ: വായ്പയുടെ തിരിച്ചടവ് മുടങ്ങിയതിൽ ബാങ്ക് ജീവനക്കാർ വീട്ടിലെത്തി ഭീഷണിപ്പെടുത്തിയതിനു പിന്നാലെ കഞ്ഞിക്കുഴിയിൽ കയർ ഫാക്ടറി തൊഴിലാളി ജീവനൊടുക്കി. കഞ്ഞിക്കുഴി കുഞ്ഞാറുവെളി ശശി (54) ആണ് മരിച്ചത്.
ആക്സിസ് ബാങ്കിൽ നിന്ന് മകളുടെ വിവാഹത്തിനെടുത്ത ബാങ്ക് വായ്പയുടെ തിരിച്ചടവാണ് മുടങ്ങിയത്. വെളളിയാഴ്ച ബാങ്ക് ജീവനക്കാരൻ വീട്ടിലെത്തിയിരുന്നതായി ബന്ധുക്കൾ പറയുന്നു.
വീടിന്‍റെ ആധാരം പണയം വെച്ചാണ് ശശി വായ്പ എടുത്തത്. തിരിച്ചടവ് മുടങ്ങിയതിൽ ബാങ്ക് ജീവനക്കാർ വീട്ടിലെത്തി ഭീഷണിപ്പെടുത്തിയെന്നാണ് കുടുംബം ആരോപിക്കുന്നത്. രണ്ട് മരുമക്കളുടെ മുന്നിൽ വെച്ചാണ് ഭീഷണിപ്പെടുത്തിയത്. വീടിന്‍റെ ഫോട്ടോയും ജീവനക്കാരൻ എടുത്തു. ബാങ്ക് ഭീഷണിപ്പെടുത്തിയതിൽ ശശിക്ക് മനോവിഷമം ഉണ്ടായിരുന്നു. ശശിക്ക് മറ്റ് ബാധ്യതകൾ ഇല്ലായിരുന്നെന്നും സഹോദരൻ പറയുന്നു.
