16 June, 2022 09:32:06 AM
എസ്എസ്എൽസി പരീക്ഷാഫലത്തിന് പിന്നാലെ കായംകുളത്ത് നിന്നും കാണാതായ കുട്ടികളെ കണ്ടെത്തി
ആലപ്പുഴ: എസ്എസ്എൽസി പരീക്ഷാ ഫലം വന്നതിന് പിന്നാലെ കായംകുളത്ത് നിന്നും കാണാതായ കുട്ടികളെ കണ്ടെത്തി. എറണാകുളത്ത് നിന്നുമാണ് ഇവരെ കണ്ടെത്തിയത്. കുട്ടികള്‍ നിലവില്‍ എറണാകുളം എളമക്കര പോലീസ് സ്റ്റേഷനിലാണ്. മാതാപിതാക്കള്‍ക്കൊപ്പം ഇവരെ വിട്ടയ്ക്കും. ബുധനാഴ്ച വൈകുന്നേരമാണ് എരുവ കോട്ടപ്പുറത്ത് പടീറ്റതിൽ അനിയുടെ മകൻ അക്സം, കായംകുളം കളീക്കൽ തെക്കതിൽ അബ്ദുൽ വാഹിദിന്‍റെ മകൻ ലുക്ക്മാൻ എന്നിവരെ കാണാതായത്.
കായംകളം ബോയ്സ് ഹൈസ്കൂളിലെ വിദ്യാർഥികളാണ് ഇരുവരും. പരീക്ഷയിൽ ഇരുവരും വിജയിച്ചെങ്കിലും കിട്ടിയ ഗ്രേഡുകൾ കുറവായിരുന്നു. കുട്ടികളെ കാണാനില്ലെന്ന് കാണിച്ച് രണ്ടു കുട്ടികളുടേയും മാതാപിതാക്കൾ കായംകുളം പോലീസ് സ്റ്റേഷനിൽ പരാതി നൽകിയിരുന്നു. ഇവർക്കായി പോലീസ്, ബസ് സ്റ്റാൻഡുകളും റെയിൽവേ സ്റ്റേഷനുകളും കേന്ദ്രീകരിച്ച് തെരച്ചിൽ നടത്തിയിരുന്നു. കായംകുളം റെയിൽവേ സ്റ്റേഷന് സമീപത്ത് നിന്നും കുട്ടികളുടെ സൈക്കിളുകളും പോലീസ് കണ്ടെത്തിയിരുന്നു.
