23 October, 2021 04:41:28 PM
നഗരമധ്യത്തിൽ ബൈക്ക് അഭ്യാസം: യുവതിയെ ഇടിച്ചുതെറുപ്പിച്ചു; യുവാവിനെതിരേ കേസ്
പാലക്കാട്: നഗരത്തിലെ എസ്ബിഐ ജംഗ്ഷനിൽ ഇരുചക്ര വാഹനത്തിൽ അഭ്യാസപ്രകടനം നടത്തിയ യുവാവിനെതിരേ ട്രാഫിക് പോലീസ് കേസെടുത്തു. പരുത്തുപ്പുള്ളി സ്വദേശി ആദർശിനെതിരേയാണ് അലക്ഷ്യമായി വാഹനം ഓടിച്ചതിന് കേസെടുത്തിരിക്കുന്നത്. ഇയാളുടെ ലൈസൻസ് സസ്പെൻഡ് ചെയ്യാൻ മോട്ടോർ വാഹന വകുപ്പ് നടപടികൾ തുടങ്ങി. വെള്ളിയാഴ്ച വൈകിട്ട് 4.30 ഓടെയായിരുന്നു യുവാവിന്‍റെ അഭ്യാസപ്രകടനം.
തെറ്റായ ദിശയിൽ ഓവർടേക്ക് ചെയ്ത യുവാവ് ഇരുചക്ര വാഹനത്തിൽ പോയ യുവതിയെ ഇടിച്ചിട്ട ശേഷം വാഹനം നിർത്താതെ ഓടിച്ചുപോയി. സംഭവസമയം മറ്റ് വാഹനങ്ങൾ പിന്നാലെ വരാതിരുന്നതിനാൽ യുവതി കൂടുതൽ അപകടത്തിൽ നിന്നും രക്ഷപെടുകയായിരുന്നു. സ്ഥലത്തുണ്ടായിരുന്ന കാർ യാത്രികൻ മൊബൈൽ ഫോണിൽ പകർത്തിയ ദൃശ്യങ്ങൾ സമൂഹമാധ്യമത്തിൽ പ്രചരിച്ചതോടെയാണ് ബൈക്ക് യാത്രികനായ യുവാവിനെ പോലീസ് കണ്ടെത്തിയത്. ഇയാളെ പിന്നീട് സ്റ്റേഷനിലേക്ക് വിളിച്ചുവരുത്തിയിരുന്നു.
