27 May, 2021 05:10:51 PM
കോവിഡ്: പാലക്കാട് 788 പേര്‍ക്കെതിരെ കേസ്; 162 പേര്‍ അറസ്റ്റില്‍; 383 വാഹനങ്ങള്‍ പിടിച്ചെടുത്തു
പാലക്കാട്: ലോക് ഡൗണ്‍ പ്രഖ്യാപിച്ച സാഹചര്യത്തില്‍ മാസ്ക് ധരിക്കാത്തതുള്‍പ്പെടെ കോവിഡ് മാനദണ്ഡങ്ങള്‍ പാലിക്കാത്തതിനെ തുടര്‍ന്ന് ജില്ലയില്‍ ഇന്നലെ (മെയ് 26) പോലീസ് നടത്തിയ പരിശോധനയില്‍ 788 കേസ് രജിസ്റ്റര്‍ ചെയ്തു. ഇതില്‍ 637 കേസും മാസ്ക് ധരിക്കാത്തവര്‍ക്കെതിരെയാണ്. ഇത്രയും കേസുകളിലായി 162 പേരെ അറസ്റ്റ് ചെയ്തു . 383 വാഹനങ്ങളും പിടിച്ചെടുത്തു.
അനാവശ്യമായി പുറത്തിറങ്ങുക, പൊതുസ്ഥലങ്ങളില്‍ കൂട്ടംകൂടുക തുടങ്ങിയ കാരണങ്ങളാലാണ് കേസുകള്‍ രജിസ്റ്റര്‍ ചെയ്തത്. മാസ്ക് ധരിക്കാതെ പൊതുസ്ഥലങ്ങളില്‍ ഇറങ്ങിയവരെ മാസ്ക് ധരിക്കേണ്ടതിന്റെ ആവശ്യകത ബോധ്യപ്പെടുത്തി പിഴ അടയ്ക്കാന്‍ നോട്ടീസ് നല്‍കി വിട്ടയച്ചു.
ഇതുകൂടാതെ സെക്ടറല്‍ മജിസ്‌ട്രേറ്റുമാര്‍ മെയ് 26 ന് നടത്തിയ പരിശോധനയില്‍ 248 പ്രോട്ടോകോള്‍ ലംഘനങ്ങള്‍ കണ്ടെത്തി. 53 പേരാണ് പരിശോധന നടത്തിയത്. ശാരീരിക അകലം, മാസ്ക്, സാനിറ്റൈസിംഗ് ലംഘനം, കൂട്ടംകൂടി നില്‍ക്കുക, പൊതുസ്ഥലങ്ങളില്‍ തുപ്പുക, സമയ പരിധി കഴിഞ്ഞിട്ടും കടകള്‍ തുറന്നു വെക്കുക എന്നിവയ്‌ക്കെതിരെയാണ് കേസ് എടുത്തത്. കടകള്‍, ആരാധനാലയങ്ങള്‍, വിവാഹം ഉള്‍പ്പെടെയുള്ള പരിപാടികള്‍, കണ്ടെയ്ന്‍മെന്റ് സോണുകള്‍ എന്നിവിടങ്ങളിലും പരിശോധന തുടരുന്നുണ്ട്. ഇത്തരം സ്ഥലങ്ങളില്‍ 24 മണിക്കൂറാണ് പരിശോധന നടത്തുക.
