22 February, 2021 04:29:30 PM
മാന്നാറിൽ നിന്ന് തട്ടിക്കൊണ്ടു പോയ യുവതിയെ വടക്കഞ്ചേരിയിൽ ഉപേക്ഷിച്ചു
ആലപ്പുഴ: ആലപ്പുഴ മാന്നാറിൽ നിന്ന് തട്ടിക്കൊണ്ടു പോയ യുവതിയെ ഉപേക്ഷിച്ച നിലയിൽ കണ്ടെത്തി. പാലക്കാട് വടക്കഞ്ചേരിയിൽ നിന്നാണ് യുവതിയെ കണ്ടെത്തിയത്. സംഭവത്തിന് പിന്നിൽ സ്വർണക്കടത്ത് സംഘത്തിന് പങ്കുണ്ടെന്ന് ആരോപണമുയർന്നിരുന്നു. 11 മണിയോടെയാണ് ആലത്തൂർ വടക്കഞ്ചേരി ദേശീയപാതയിൽ യുവതിയെ കാണുന്നത്. ഈ സമയം യുവതി വീട്ടിലേക്ക് ഫോൺ ചെയ്യാൻ ഒരാളോട് ആവശ്യപ്പെടുകയായിരുന്നു.
തുടർന്ന് യുവതി നാട്ടുകാരോട് കാര്യങ്ങൾ തുറന്നു പറഞ്ഞു. നാട്ടുകാർ പൊലീസിൽ വിവരം അറിയിക്കുകയായിരുന്നു. തുടർന്ന് വടക്കഞ്ചേരി എസ്‌ഐയുടെ നേതൃത്വത്തിലുള്ള സംഘമെത്തി യുവതിയെ പൊലീസ് സ്റ്റേഷനിലേക്ക് കൂട്ടികൊണ്ടുപോയി. പുലർച്ചെ രണ്ടു മണിയോടെയാണ് മാന്നാർ കുഴീക്കാട്ട് വിളയിൽ ബിനോയിയുടെ ഭാര്യ ബിന്ദു(39)വിനെ 20 അംഗ സംഘം തട്ടിക്കൊണ്ടു പോയത്. നാലു ദിവസം മുമ്പാണ് ബിന്ദു ദുബായിൽ നിന്ന് നാട്ടിലെത്തിയത്.
