04 July, 2020 11:10:22 PM
അസമയത്ത് പോലീസ് ജീപ്പിൽ യുവതിയുമായി കറക്കം; ഇന്‍സ്പെക്ടര്‍ക്ക് സസ്പെന്‍ഷന്‍
കണ്ണൂര്‍: പോലീസ് ജീപ്പിൽ യുവതിയുമായി കറങ്ങിയ സംഭവത്തിൽ പോലീസ് ഇന്‍സ്പെക്ടര്‍ക്ക് സസ്പെൻഷന്‍. കരിക്കോട്ടക്കരി പോലീസ് ഇന്‍സ്പെക്ടര്‍ സി.ആർ.സിനുവിനെയാണ് സസ്‌പെൻഡ് ചെയ്തത്. ഇരിട്ടിക്കടുത്തുള്ള യുവതി എറണാകുളം സ്വദേശിയായ സിഐക്കൊപ്പം അസമയത്ത് പോലീസ് ജീപ്പിൽ ആളൊഴിഞ്ഞ പ്രദേശത്ത് കൂടി സഞ്ചരിച്ചിരുന്നതായി ജില്ലാ പോലീസ് മേധാവിക്ക് വാട്സ് ആപ്പിൽ കിട്ടിയ പരാതിയെ തുടർന്നാണ് നടപടി. സംഭവത്തില്‍ ഡ്രൈവർ ഷെരീഫിനെ കണ്ണൂർ എആർ ക്യാമ്പിലേക്ക് മാറ്റി.
ഡിസിആർബി ഡിവൈഎസ്പി പി.പ്രേമരാജൻ നല്‍കിയ റിപ്പോർട്ടിന്‍റെ അടിസ്ഥാനത്തില്‍ അന്വേഷണ വിധേയമായി സസ്‌പെൻഡ് ചെയ്യുകയായിരുന്നു. അതേസമയം, എറണാകുളത്തു ജോലി ചെയ്തിരുന്ന യുവതിയുമായി അക്കാലത്തുള്ള പരിചയം കാരണം സൗഹൃദ സംഭാഷണം നടത്തുക മാത്രമാണ് ചെയ്‌തതെന്നായിരുന്നു സിഐയുടെ വിശദീകരണം.കണ്ണൂർ അഡീഷണൽ എസ്പി പ്രജീഷ് തോട്ടത്തിലാണ് തുടർഅന്വേഷണം നടത്തുന്നത്.
