19 May, 2020 04:18:37 PM
ദുബായിൽനിന്ന് മടങ്ങിയെത്തിയ മയ്യഴി സ്വദേശിക്ക് കോവിഡ് സ്ഥിരീകരിച്ചു
മാഹി: മയ്യഴിയിൽ ഒരാൾക്ക് കോവിഡ്. ദുബായിൽനിന്നെത്തിയ ഈസ്റ്റ് പള്ളൂർ സ്വദേശിക്കാണ് കോവിഡ് സ്ഥിരീകരിച്ചത്. ഞായറാഴ്ച രാത്രി ഒമ്പതിന് കണ്ണൂർ വിമാനത്താവളത്തിലാണ് ഇയാൾ ഇറങ്ങിയത്. ഹൃദ്‌രോഗിയായതിനാൽ മയ്യഴിയിലെ ജനറൽ ആശുത്രിയിൽ പ്രവേശിപ്പിച്ചിരുന്നു.
കോവിഡ് ലക്ഷണങ്ങളൊന്നും 51 കാരനായ ഇദ്ദേഹത്തിന് ഉണ്ടായിരുന്നില്ല. എന്നാൽ മറ്റ് അസുഖങ്ങൾ ഉണ്ടായിരുന്നതിനാലാണ് സ്രവ പരിശോധന നടത്തിയത്. ഇതിലാണ് കോവിഡ് കണ്ടെത്തിയത്. ഇതോടെ മാഹിയിൽ കോവിഡ് ബാധിച്ചവരുടെ എണ്ണം മൂന്നായി. ഇതിൽ ഒരാൾ മരിച്ചിരുന്നു. ഒരാൾ രോഗം ഭേദമായി നേരത്തെ ആശുപത്രിവിട്ടു.
