14 October, 2019 03:11:38 AM
കൊഴിഞ്ഞാമ്പാറയിൽ ലോറിയും ബൈക്കും കൂട്ടിയിടിച്ചുണ്ടായ അപകടത്തില്‍ മൂന്ന് എൻജിനിയറിംഗ് വിദ്യാർഥ‌ികൾ മരിച്ചു
പാലക്കാട്: ലോറിയും ബൈക്കും കൂട്ടിയിടിച്ചു കൊഴിഞ്ഞാമ്പാറയിൽ മൂന്ന് എൻജിനിയറിംഗ് വിദ്യാർഥ‌ികൾ മരിച്ചു. ചിറ്റൂർ അത്തിക്കോട് പനയൂർ നെടുന്പാറ ഉദയലാലിന്‍റെ മകൻ പ്രജീഷ് ലാൽ (20), നല്ലേപ്പിള്ളി ഇരട്ടക്കുളം അപ്പുപ്പിള്ളയൂർ ദിവാകരന്‍റെ മകൻ ദിലേജ് (19), കണ്ണൻമേട് കുളത്തിങ്കൽ വീട്ടിൽ ബാലകൃഷ്ണന്‍റെ മകൻ റോഹിൻ (20) എന്നിവരാണു മരിച്ചത്.
ശനിയാഴ്ച രാത്രി 10.30ന് കൊഴിഞ്ഞാന്പാറ സൂര്യപാറ വളവ് റോഡിലാണ് അപകടം. സംഭവവുമായി ബന്ധപ്പെട്ട് ലോറി ഡ്രൈവർ പുതുക്കോട്ടൈ അങ്കപ്പട്ടി കവിനാട് വെസ്റ്റ് ഗണേശന്‍റെ മകൻ രംഗസ്വാമി(31)യെ കൊഴിഞ്ഞാന്പാറ പോലീസ് കസ്റ്റഡിയിലെടുത്തു. മരണപ്പെട്ട മൂവരും കോയന്പത്തൂർ എൻജിനിയറിംഗ് കോളജിലെ വിദ്യാർഥികളാണ്.
ലോറിയിടിച്ച് ബൈക്ക് പൂർണമായും തകർന്നു. കൊഴിഞ്ഞാന്പാറ പോലീസിന്റെ ഇൻക്വസ്റ്റിനുശേഷം ജില്ലാ ആശുപത്രിയിൽ റോഹിനൊഴികെയുള്ള മറ്റു രണ്ടു പേരുടെയും പോസ്റ്റ്മോർട്ടം നടത്തി. വിദേശത്തുള്ള ബന്ധു എത്തിയ ശേഷമേ റോഹിന്‍റെ പോസ്റ്റ്മോർട്ടം നടത്തൂ. പ്രിയയാണ് പ്രജീഷ് ലാലിന്‍റെ അമ്മ. സഹോദരൻ പ്രജിത്ത് ലാൽ. ദിലേജിന്‍റെ അമ്മ ഗിരിജ. സഹോദരി: റിൻസി. റോഹിന്‍റെ അമ്മ പ്രിയാകുമാരി.
