13 April, 2023 10:19:23 AM
ട്രെയിന്‍ തീവെപ്പ്: പ്രതിയെ ഇന്ന് ഷൊര്‍ണൂരിലെത്തിച്ച് തെളിവെടുക്കും
പാലക്കാട് : എലത്തൂര്‍ ട്രെയിന്‍ തീവെപ്പ്ക്കേസിലെ പ്രതി ഷാരൂഖ് സെയ്ഫിയെ ഇന്ന് ഷൊര്‍ണൂരിലെത്തിച്ച് തെളിവെടുക്കും. ഷൊര്‍ണൂര്‍ റെയില്‍വേ സ്റ്റേഷന് സമീപമുള്ള പെട്രോള് പമ്പില്‍ നിന്നാണ് ഇയാള്‍ പെട്രോള് വാങ്ങിയതെന്ന് അന്വേഷണസംഘം കണ്ടെത്തിയിട്ടുണ്ട്. സ്‌റ്റേഷനിലും പെട്രോള് പമ്പിലും പ്രതിയെ എത്തിച്ച് തെളിവെടുപ്പ് നടത്തും.
പുലര്‍ച്ചെ 4ന് ഷൊര്‍ണൂരില്‍ ട്രെയിനിറങ്ങിയ ഇയാള്‍ വൈകിട്ട് 7വരെ ഇവിടെ സമയം ചെലവഴിച്ചതിനെപ്പറ്റിയും പോലീസ് അന്വേഷിക്കുന്നുണ്ട്. സ്റ്റേഷന് അഞ്ച് കിലോമീറ്റര്‍ ചുറ്റളവിലുള്ള പ്രദേശത്ത് നേരത്തെ അന്വേഷണസംഘം പരിശോധന നടത്തിയിരുന്നു.
ഇതിന്‍റെ അടിസ്ഥാനത്തില്‍ കൂടുതല്‍ ഇടങ്ങളില്‍ ഇയാളെ എത്തിച്ച് തെളിവെടുപ്പ് നടത്താനും സാധ്യതയുണ്ട്. ഇതിനുശേഷമാകും ആക്രമണം നടന്ന എലത്തൂരിലെത്തിച്ച് തെളിവെടുപ്പ് നടത്തുക. പ്രതിയെ ബുധനാഴ്ച കണ്ണൂരിലെത്തിച്ച് തെളിവെടുപ്പ് നടത്തിയിരുന്നു. ആക്രമണം നടത്തിയ കോച്ചിലാണ് തെളിവെടുപ്പ് നടന്നത്.
