20 May, 2021 12:59:56 AM
ജീവനക്കാരെ ആക്രമിച്ചശേഷം ഫാമിലെ ആട്ടിന്‍കുട്ടികളെ തല്ലിക്കൊന്ന ഇതരസംസ്ഥാന തൊഴിലാളി അറസ്റ്റില്‍
തൃശ്ശൂര്‍: ഫാമില്‍ അതിക്രമിച്ചുകയറി ജീവനക്കാരെ ആക്രമിച്ച് ഓടിച്ചശേഷം 6 ആട്ടിന്‍കുട്ടികളെ തല്ലിക്കൊന്ന യുവാവ് അറസ്റ്റില്‍. വരന്തരപ്പിള്ളി പിടിക്കപറമ്പില്‍ ഫാമില്‍ അതിക്രമിച്ചുകയറിയ ഇതരസംസ്ഥാന തൊഴിലാളിയായ ബിഹാര്‍ സ്വദേശി ഉമഷ് ഹസ്ദയെ (32) വരന്തരപ്പിള്ളി പൊലീസ് അറസ്റ്റ് ചെയ്തു. ആക്രമത്തില്‍ ഒരു ആട്ടിന്‍കുട്ടിക്ക് സാരമായ പരിക്കുണ്ട്. ബുധനാഴ്ച രാവിലെ വരാക്കര സ്വദേശി കാര്യാട്ട് സുനില്‍കുമാറിന്റെ ഉടമസ്ഥതയിലുള്ള ഫാമിലായിരുന്നു ദാരുണസംഭവം അരങ്ങേറിയത്.
ഫാമിലുണ്ടായിരുന്ന രണ്ട് ബിഹാര്‍ സ്വദേശികളായ ജീവനക്കാരെ ആക്രമിച്ച് ഓടിച്ചശേഷം ഉമഷ് കൈക്കോട്ട് കൊണ്ട് ആട്ടിന്‍കുട്ടികളെ തല്ലി കൊല്ലുകയായിരുന്നെന്ന് പൊലീസ് പറഞ്ഞു. ശേഷം ഉമഷ് ഹസ്ദ ഫാമിനോട് ചേര്‍ന്നുള്ള ഫാര്‍മസിയിലെ അലമാര, ഫര്‍ണിചറുകള്‍, പാത്രങ്ങള്‍, ശുചിമുറി എന്നിവ തകര്‍ക്കുകയും മരുന്നുകള്‍ നശിപ്പിക്കുകയും ചെയ്തിട്ടുണ്ട്. 50,000 രൂപയുടെ നാശനഷ്ടം കണക്കാക്കുന്നു. അക്രമം കാണിച്ച ഫാമില്‍ ഉമഷ് ഹസ്ദ കഴിഞ്ഞ വര്‍ഷം കുറച്ചുദിവസം ജോലി ചെയ്തിരുന്നു. എന്നാല്‍ ഇയാള്‍ ഫാമില്‍ അതിക്രമം കാണിക്കാനുള്ള കാരണം അറിയില്ലെന്ന് ഉടമ സുനില്‍കുമാര്‍ വ്യക്തമാക്കി.
