04 August, 2020 01:03:02 PM
കോവിഡിന്‍റെ കളികൾ; ഫൗളിന് മാത്രമല്ല, ഇനി ചുമച്ചാലും റെഡ് കാർഡ് ലഭിക്കും
ദില്ലി: ഫുട്ബോൾ കളത്തിൽ മനപൂർവം ചുമച്ചാലും ഇനി റെഡ് കാർഡ് ലഭിക്കാം. അപകടകരമാം വിധം ഫൗൾ ചെയ്യുന്നതിനായിരുന്നു ഇതുവരെ ചുവപ്പ് കാർഡ് നൽകിയിരുന്നെങ്കിൽ ഇനി ചുമച്ചാലും പുറത്തേക്കുള്ള വഴി തെളിയും. കോവിഡ് മഹാമാരിയുടെ പശ്ചാത്തലത്തിലാണ് പുതിയ തീരുമാനം. രാജ്യാന്തര ഫുട്ബോൾ അസോസിയേഷൻ ബോർഡ് ആണ് പുതിയ നിയമം കൊണ്ടുവന്നത്.
നിന്ദ്യമായ, അധിക്ഷേപകരമായ ഭാഷ ഉപയോഗിക്കുക ആംഗ്യങ്ങൾ ഉപയോഗിച്ച് അവഹേളിക്കുക തുടങ്ങിയവയ്ക്കും ചുവപ്പ് കാർഡ് പുറത്തെടുക്കാം. എല്ലാ ഫൈളുകളും പോലെ റഫറിക്കാണ് അന്തിമ തീരുമാനമെടുക്കാനുള്ള അവകാശം. മനപൂർവമല്ലാതെ ചുമയ്ക്കുന്നതും അകലം പാലിച്ച് ചുമയ്ക്കുന്നതും കുറ്റമല്ല. എന്നാൽ മനപൂർവം എതിർ കളിക്കാരന് അടുത്തു ചെന്ന് ചുമയ്ക്കുന്നത് കുറ്റകരമാണ്. ഇക്കാര്യങ്ങൾ വിശദീകരിച്ച് ഫുട്ബോൾ അസോസിയേഷൻ ബോർഡ് മാർഗനിർദേശം പുറപ്പെടുവിച്ചു.
