30 June, 2023 11:39:01 AM
തിരുവനന്തപുരത്ത് നിർത്തിയിട്ടിരുന്ന കെഎസ്ആർടിസി ബസിനു പിന്നിൽ കാറിടിച്ച് അപകടം
തിരുവനന്തപുരം: ദേശീയപാതയിൽ ആറ്റിങ്ങൽ മാമത്ത് ബസ് സ്റ്റോപ്പിൽ നിർത്തിയിട്ടിരുന്ന കെഎസ്ആർടിസി ബസിൽ കാറിടിച്ച് കയറി 3 പേർക്ക് പരിക്ക്. ഇന്ന് രാവിലെ 6.30 ഓടെയായിരുന്നു അപകടം.
കാറിലുണ്ടായിരുന്ന ആൾക്കും സമീപത്ത് ബസ് കാത്തുനിന്ന 2 പേർക്കുമാണ് പരിക്കേറ്റത്. കാർ ഡ്രൈവർ ഉറങ്ങിപ്പോയതാണ് അപകടത്തിന് കാരണമായതെന്നാണ് പ്രാഥമിക വിവരം.
അപകടത്തിൽ പരിക്കേറ്റ 2 പേരെ തിരുവനന്തപുരം മെഡിക്കൽ കോളെജ് ആശുപത്രിയിൽ പ്രവേശിപ്പിച്ചിരിക്കുകയാണ്. 2 യാത്രക്കാരെ ഇടിച്ചതിന് ശേഷമാണ് അമിതവേഗത്തിലെത്തിയ കാർ ബസിലേക്ക് ഇടിച്ചുകയറിയത്.
അപകടത്തിൽ കാറിന്‍റെ മുന്‍ ഭാഗം പൂർണമായും തകർന്നു. ആറ്റിങ്ങൽ അഗ്നിരക്ഷാസേന സ്ഥലത്തെത്തി ഏറെ പരിശ്രമത്തിനൊടുവിലാണ് ഡ്രൈവറെ പുറത്തെടുത്തത്. അലി എന്ന വ്യക്തിയാണ് വർക്കല രജിസ്ട്രേഷനുള്ള കാർ ഓടിച്ചിരുന്നതെന്നാണ് വിവരം.
