19 June, 2023 08:21:38 AM
യുവാവിനെ ആക്രമിച്ച് ഭീകരാന്തരീക്ഷം സൃഷ്ടിച്ച മൂന്നംഗ ഗുണ്ടാസംഘം അറസ്റ്റിൽ
തിരുവനന്തപുരം: കണിയാപുരം പാച്ചിറയിൽ ഭീകരാന്തരീക്ഷം സൃഷ്ടിച്ചശേഷം യുവാവിനെ ആക്രമിച്ച മൂന്നംഗ ഗുണ്ടാ സംഘത്തെ അറസ്റ്റ് ചെയ്തു. വധശ്രമമുൾപ്പെടെ നിരവധി കേസിലെ പ്രതികളായ വാവറ അമ്പലം മണ്ഡപകുന്ന് എ.പി. മൻസിലിൽ അൻവർ (37), അണ്ടൂർക്കോണം പറമ്പിൽപാലം എ.എ.മൻസിലിൽ അനീഷ് (36), പറമ്പിൽപ്പാലം പണയിൽ വീട്ടിൽ റാഷിദ് (28) എന്നിവരെയാണ് മംഗലപുരം പോലീസ് അറസ്റ്റ് ചെയ്തത്.
പാച്ചിറ തുപ്പട്ടീൽ സുധീറിനാണ് മർദനമേറ്റത്. ശനിയാഴ്ച രാത്രി ഏഴു മണിയോടെ കാറിലെത്തിയ അക്രമിസംഘം പാച്ചിറയിലെ ഹോട്ടലിനു സമീപം ചായ കുടിച്ചുകൊണ്ടുനിൽക്കുകയായിരുന്ന അഞ്ചോളം വിദ്യാർഥികളെ മർദിക്കാൻ ശ്രമിച്ചു. ഇതു ചോദ്യം ചെയ്ത പാച്ചിറ സ്വദേശി സുധീറിനെ സംഘം തറയിൽ തള്ളിയിട്ട് ക്രൂരമായി മർദിക്കുകയായിരുന്നു. തുടർന്ന് സ്ഥലത്ത് ഭീകരാന്തരീക്ഷം സൃഷ്ടിച്ചശേഷം പ്രതികൾ രക്ഷപ്പെട്ടു.
മാസങ്ങൾക്കുമുമ്പ് ഇതേ സംഘത്തിലെ രണ്ടു പ്രതികൾ പാച്ചിറ സ്വദേശിയായ ഫെമിലിനെ ക്രൂരമായി മർദിച്ചു കൊലപ്പെടുത്താൻ ശ്രമിച്ച കേസിൽ ജയിലിലായിട്ടുണ്ട്. പിടിയിലായ മൂന്നു പ്രതികൾക്കും നിരവധി കേസുകൾ നിലവിലുള്ളതായി മംഗലപുരം പോലീസ് പറഞ്ഞു.
