21 August, 2022 06:49:47 PM
ഭർത്താവ് തൂങ്ങിമരിച്ചു; വിവരമറിഞ്ഞ ഭാര്യ ആസിഡ് കുടിച്ച് ആത്മഹത്യ ചെയ്തു
തിരുവനന്തപുരം: നെടുമങ്ങാട്ട് ഭർത്താവ് ആത്മഹത്യ ചെയ്തതറിഞ്ഞ് ഭാര്യ ആസിഡ് കുടിച്ച് ആത്മഹത്യ ചെയ്തു. ഉഴമലക്കൽ പരുത്തിക്കുഴി സ്വദേശികളായ രാജേഷ് (38), അപർണ (26) എന്നിവരാണ് മരിച്ചത്. രാജേഷ് വീടിനുള്ളിൽ തൂങ്ങിമരിച്ച വിവരം കേട്ട് ഭാര്യ അപർണ ആസിഡ് കഴിച്ചാണ് ആത്മഹത്യ ചെയ്തത്. സൗന്ദര്യ പിണക്കങ്ങളെ തുടർന്ന് ഒരാഴ്ചയായി പിരിഞ്ഞ് കഴിയുകയായിരുന്നു ഇരുവരും.
അപർണയുടെയും രാജേഷിന്റെയും വീടുകൾ തമ്മിൽ 100 മീറ്റർ അകലമുണ്ട്. ഇന്നലെ വൈകിട്ട് അപർണയുടെ വീട്ടിലെത്തി രാജേഷ് ഭാര്യയെയും മകളെയും വീട്ടിലേക്ക് വിളിച്ചുവരുത്തി. എന്നാൽ ഭർത്താവിനൊപ്പം പോകാൻ അപർണ തയ്യാറായില്ല. തുടർന്ന് രാത്രി വീട്ടിലെത്തിയ രാജേഷ് മുറിക്കുള്ളിൽ തൂങ്ങിമരിച്ചു. ഇന്ന് രാവിലെ പത്തരയോടെയാണ് അപർണ രാജേഷിന്‍റെ മരണവാർത്ത അറിയുന്നത്. ഉടൻ തന്നെ അപർണ വീട്ടിൽ കയറി ആസിഡ് എടുത്ത് കുടിച്ചു.
നാട്ടുകാർ നെടുമങ്ങാട് ജില്ലാ ആശുപത്രിയിലും അവിടെ നിന്ന് തിരുവനന്തപുരം മെഡിക്കൽ കോളജ് ആശുപത്രിയിലും എത്തിച്ചു. ഐസിയുവിൽ ചികിത്സയിലിരിക്കെ ഒരു മണിയോടെയാണ് അപർണ മരിച്ചത്. ഇരുവരുടെയും മൃതദേഹങ്ങൾ മോർച്ചറിയിൽ സൂക്ഷിച്ചിരിക്കുകയാണ്. വാലിമല പോലീസ് കേസെടുത്ത് അന്വേഷണം ആരംഭിച്ചു.
