11 July, 2020 01:18:44 AM
പൂന്തുറയിൽ എസ്ഐക്ക് കോവിഡ്: കൂടുതൽ പോലീസുകാര് നിരീക്ഷണത്തിലാകും
തിരുവനന്തപുരം: പൂന്തുറയിൽ എസ്ഐക്ക് കോവിഡ് സ്ഥിരീകരിച്ചു. സൂപ്പർ സ്പ്രെഡുണ്ടായ പൂന്തുറയിൽ സ്ഥിതി ഗുരുതരമായി തുടരുന്നതിനിടെയാണ് ഡ്യൂട്ടിയിലുണ്ടായിരുന്ന പോലീസുകാരനും കോവിഡ് സ്ഥിരീകരിച്ചത്. എസ്ഐക്ക് കോവിഡ് സ്ഥിരീകരിച്ച സംഭവത്തിൽ പോലീസിന് വീഴ്ചയുണ്ടായതാണ് റിപ്പോർട്ട്. എസ്ഐയുടെ സാന്പിൾ എടുത്തശേഷം ഇയാളെ ജോലിയിൽ തുടരാൻ അനുവദിച്ചിരുന്നതായാണ് വിവരം.
ഇതോടെ കൂടുതൽ പോലീസുകാരെ നിരീക്ഷണത്തിലാക്കും. പൂന്തുറ, മാണിക്യവിളാകം, പുത്തൻപള്ളി മേഖലകളിൽ കഴിഞ്ഞ മൂന്ന് ദിവസത്തിനിടെ 233 പേർക്കാണ് കോവിഡ് സ്ഥിരീകരിച്ചത്. ഇതോടെ പൂന്തുറ ഉൾപ്പെടുന്ന പ്രദേശങ്ങളിൽ അധികൃതർ കർശന നിയന്ത്രണമാണ് ഏർപ്പെടുത്തിയിരിക്കുന്നത്
