26 January, 2020 06:37:02 PM
വസ്തു ഉടമയെ ജെസിബി കൊണ്ട് അടിച്ചു കൊലപ്പെടുത്തിയ കേസിൽ മൂന്ന് പേർ പിടിയിൽ
തിരുവനന്തപുരം: സ്വന്തം ഭൂമിയിൽനിന്നു മണ്ണെടുക്കുന്നതു തടഞ്ഞ വസ്തു ഉടമയെ ജെസിബി കൊണ്ട് അടിച്ചു കൊലപ്പെടുത്തിയ കേസിൽ കൂടുതൽ പേർ പിടിയിൽ. മണ്ണുമാന്തിയന്ത്രത്തിന്‍റെ ഉടമ ഉള്‍പ്പെടെ മൂന്നു പേരാണ് പിടിയിലായത്. ഇതോടെ പിടിയിലായവരുടെയെണ്ണം ആറായി. ഇവരിൽ രണ്ടു പേർ പ്രതികള്‍ക്ക് രക്ഷപെടാന്‍ വഴിയൊരുക്കിയവരാണെന്ന് പോലീസ് പറഞ്ഞു. കാട്ടാക്കടയ്ക്കടുത്ത് അന്പലത്തിൻകാല കാഞ്ഞിരംമൂട്ടിൽ ശനിയാഴ്ച പുലർച്ചെ രണ്ടരയോടെയായിരുന്നു സംഭവം.
അമ്പലത്തിൻകാല കാഞ്ചിരവിള ശ്രീമംഗലം വീട്ടിൽ സംഗീത് (40)ആണു കൊല്ലപ്പെട്ടത്. ജെസിബി ഡ്രൈവറായ വിജിൻ (24) പിന്നീട് കീഴടങ്ങിയിരുന്നു. സംഗീതിന്‍റെ പുരയിടത്തിൽനിന്നു മണ്ണ് കടത്താൻ ജെസിബിയുമായി എത്തിയ സംഘം മണ്ണ് കൊണ്ടുപോകുന്നത് സംഗീത് തടഞ്ഞതിനെത്തുടർന്നുണ്ടായ തർക്കത്തിനിടെ ജെസിബിയുടെ കൈ കൊണ്ട് സംഗീതിനെ അടിച്ചു വീഴ്ത്തുകയായിരുന്നു. വിദേശത്തായിരുന്ന സംഗീത് ഇപ്പോൾ നാട്ടിൽ ചിക്കൻ സ്റ്റാൾ നടത്തി വരികയായിരുന്നു
