14 January, 2020 10:16:09 AM
മിനിലോറി നിയന്ത്രണം വിട്ട് മറിഞ്ഞു ഡ്രൈവർ ഉൾപ്പെടെ നാലുപേർക്ക് പരിക്ക്
തിരുവനന്തപുരം: പൗൾട്രി ഫോമുകളിലേയ്ക്ക് കോഴിയുമായെത്തിയ മിനിലോറി നിയന്ത്രണം വിട്ട് മറിഞ്ഞു ഡ്രൈവർ ഉൾപ്പെടെ നാലുപേർക്ക് പരിക്ക്. ഡ്രൈവർ നവീൺ (30), ജീവനക്കാരായ സദ്ദാം (21), മുഹദ്ദുൽ (24), വിശ്വത്റോയി (22) എന്നിവർക്കാണ് പരിക്കുപറ്റിയത്. പോത്തൻകോട് അണ്ടൂർകോണം റോഡിൽ ചൊവ്വാഴ്ച പുലർച്ചെ 4.30 നായിരുന്നു അപകടം. ലോറിയിലുണ്ടായിരുന്ന നൂറോളം കോഴികൾ ചത്തു.
കുത്തനെയുള്ള റോഡ് ഇറങ്ങി വരുന്നതിനിടയിൽ ലോറി നിയന്ത്രണം വിട്ട് മറിയുകയായിരുന്നു. പരിക്കേറ്റവരെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. അപകടത്തിൽപ്പെട്ട വാഹനത്തിൽ നിന്നും റോഡിലേയ്ക്ക് ഒഴുകിയ ഓയിലും, ഡീസലും ഫയർഫോഴ്സ് സംഘം കഴുകി വൃത്തിയാക്കി.
