04 July, 2023 10:55:51 AM
ഷാജന്‍ സ്കറിയ എവിടെ? ഓഫീസുകളില്‍ റെയ്ഡ്; 29 കമ്പ്യൂട്ടറുകൾ പിടിച്ചെടുത്തു
കൊച്ചി: മറുനാടന്‍ മലയാളി എഡിറ്റർ ഷാജന്‍ സ്കറിയയെ കണ്ടെത്താനുള്ള അന്വേഷണം തുടരുന്നു. മറുനാടന്‍ മലയാളി ഓൺലൈന്‍ ചാനലിന്‍റെ തിരുവനന്തപുരത്തെ ഓഫീസിലും കൊച്ചി ഓഫീസിലും ഇന്നലെ പൊലീസ് റെയ്ഡ് നടത്തി. ഓഫീസിലെ മുഴുവന്‍ കമ്പ്യൂട്ടറുകളും പൊലീസ് പിടിച്ചെടുത്തതായാണ് വിവരം. ഇന്നലെ രാത്രി 12 മണിയോടെയായിരുന്നു റെയ്ഡ്.
29 കമ്പ്യൂട്ടറുകൾ, ക്യാമറകൾ, ലാപ്‌ടോപ്പുകൾ എന്നിവയാണ് പൊലീസ് കസ്റ്റഡിയിലെടുത്തത്. രാത്രി 12 മണിയോടെയാണ് നടപടി. മുഴുവന്‍ ജീവനക്കാരുടെ ലാപ്ടോപ്പുകളും പിടിച്ചെടുത്തു. സ്ഥാപനത്തിലേക്ക് പ്രവേശിക്കരുതെന്ന് ജീവനക്കാർക്ക് നിർദേശം നൽകിയായിരുന്നു നടപടി.
സംസ്ഥാനത്ത് പലയിടത്തും മറുനാടന്‍ മലയാളിയുടെ ഓഫീസുകളിലും ജീവനക്കാരുടെ വീടുകളിലും പൊലീസ് പരിശോധന തുടരുകയാണ്. തിരുവനന്തപുരത്ത് മറുനാടന്‍ മലയാളിയുടെ 2 ജീവനക്കാരുടെ വീടുകളിൽ ഇന്നലെ രാവിലെ പൊലീസ് പരിശോധന നടന്നിരുന്നു. പട്ടത്തുള്ള ഓഫീസിൽ കൊച്ചിയിൽ നിന്നുള്ള പൊലീസ് കഴിഞ്ഞ ദിവസവും പരിശോധന നടത്തിയിരുന്നു.
