13 December, 2022 01:46:51 PM
കാർ മരത്തിലിടിച്ച് അമ്മയും കുഞ്ഞും മരിച്ചു; റോഡ് കേരളത്തിലും മറിഞ്ഞ കാര്‍ കര്‍ണാടകയിലും
കാസർഗോഡ്: കാർ നിയന്ത്രണംവിട്ടു മരത്തിലിടിച്ച് അമ്മയും കുഞ്ഞും മരിച്ചു. ദേലംപാടി കൊട്ടിയാടിയിലെ തേങ്ങ വ്യാപാരി സാനുവിന്‍റെ ഭാര്യ ഷാഹിന (35), മകള്‍ ഫാത്തിമത് ഷസ (നാല്) എന്നിവരാണു മരിച്ചത്. സാനുവിന്‍റെ ഉമ്മ ബീഫാത്തിമ, സഹോദരന്‍ അഷ്റഫ്, സഹോദരൻ ഹനീഫയുടെ ഭാര്യ മിസിരിയ, മകള്‍ ആറു വയസുകാരി സഹറ, മറ്റൊരു സഹോദരന്‍ യാക്കൂബിന്‍റെ ഭാര്യ സമീന, മകള്‍ അഞ്ചുവയസുകാരി അല്‍ഫ ഫാത്തിമ എന്നിവര്‍ക്കാണു പരിക്കേറ്റത്. ഇതില്‍ നാലുപേരുടെ നില ഗുരുതരമാണ്.
കേരള-കര്‍ണാടക അതിര്‍ത്തിയായ ദേലംപാടി പരപ്പയില്‍ വൈകുന്നേരം 3.45 നായിരുന്നു അപകടം. കര്‍ണാടക സുള്ള്യയിലെ വിവാഹവിരുന്നില്‍ പങ്കെടുക്കാന്‍ പുത്തൂര്‍ കര്‍ണൂര്‍ ഗോളിത്തടിയില്‍നിന്ന് യാത്ര പുറപ്പെട്ട കുടുംബമാണ് അപകടത്തില്‍പ്പെട്ടത്. ഗ്വാളിമുഖയില്‍നിന്ന് പരപ്പയിലെത്തിയപ്പോള്‍ മഴയുണ്ടായിരുന്നു. വേഗതയിലുണ്ടായിരുന്ന കാര്‍ റോഡില്‍ തെന്നിമാറി മരത്തിലിടിക്കുകയായിരുന്നു.
സംഭവത്തില്‍ കേരള പൊലീസ് കേസെടുത്തു. കേരള-കര്‍ണാടക അതിര്‍ത്തി പ്രദേശമായ പരപ്പ വില്ലേജ് ഓഫീസിന് സമീപം അപകടം നടന്നത്. റോഡില്‍ നിന്നും നിയന്ത്രണം വിട്ട് ഇന്നോവ കാര്‍ പയസ്വിനിയുടെ ഭാഗമായ പള്ളങ്കോട് പുഴയ്ക്കരികില്‍ മരത്തിലുടക്കി നില്‍ക്കുകയായിരുന്നു. അപകടത്തില്‍ ആറു പേർക്ക് പരിക്കേറ്റിരുന്നു. അതിര്‍ത്തിയിലുണ്ടായ അപകടത്തില്‍ ആര് കേസെടുക്കുമെന്ന ആശയക്കുഴപ്പത്തിനൊടുവിലാണ് കേരള പൊലീസ് കേസെടുക്കുന്നത്. അപകടം നടന്ന റോഡ് കേരളത്തിലും കാര്‍ മറിഞ്ഞത് കര്‍ണാടകയിലേക്കുമായതാണ് ആശയക്കുഴപ്പത്തിന് കാരണമായതത്.
അപകടം നടന്ന ഉടനെ തന്നെ തൊട്ടടുത്തുള്ള ചെക്ക്പോസ്റ്റില്‍ ഡ്യൂട്ടിയിലുണ്ടായിരുന്ന കര്‍ണ്ണാടക പൊലീസ് സംഘം സ്ഥലത്ത് എത്തി. എന്നാല്‍ റോഡ് കേരളത്തിലാണെന്ന് പറഞ്ഞ് തിരിച്ച് പോവുകയായിരുന്നു. തുടര്‍ന്ന് കേരള അതിര്‍ത്തിയിലെ ആദൂര്‍ സ്റ്റേഷന്‍ സിഐ എ അനില്‍കുമാറും സംഘവും സ്ഥലത്തെത്തി അപകടത്തില്‍ പരിക്കേറ്റവരെ ആശുപത്രിയില്‍ എത്തിച്ചു. എന്നാൽ സംഭവത്തിൽ കേസെടുത്തിരുന്നില്ല. നേരത്തെ ഇവിടെ അപകടം നടന്നപ്പോള്‍ കേസെടുത്തത് കര്‍ണ്ണാടക പൊലീസ് ആണെന്നാണ് നാട്ടുകാര്‍ പറഞ്ഞത്. കാര്‍ മറിഞ്ഞ സ്ഥലം കര്‍ണ്ണാടകയാണെന്നാണ് വില്ലേജ് ഓഫീസറും വ്യക്തമാക്കിയത്. ആശയക്കുഴപ്പങ്ങള്‍ക്കൊടുവില്‍ കേരള പൊലീസ് കേസെടുക്കുകയായിരുന്നു.
