14 December, 2021 08:55:31 AM
മാനന്തവാടി കുറുക്കൻ മൂലയിൽ വീണ്ടും കടുവയിറങ്ങി; ആടിനെ പിടിച്ചു
മാനന്തവാടി: വയനാട് മാനന്തവാടിയിലെ കുറുക്കൻ മൂലയിൽ വീണ്ടും കടുവയിറങ്ങി. ചൊവ്വാഴ്ച പുലർച്ചെ മൂന്നോടെ ഇറങ്ങിയ കടുവ പടമല കുരുത്തോല സുനിയുടെ ആടിനെ പിടിച്ചു. ഇതോടെ കടുവ കൊന്ന വളർത്തു മൃഗങ്ങളുടെ എണ്ണം 15 ആയി. പ്രദേശത്ത് കൂട് സ്ഥാപിച്ച് കടുവയെ പിടിക്കാൻ ഉള്ള ശ്രമങ്ങൾക്കിടയിലാണ് കടുവ വീണ്ടും ഇറങ്ങിയത്. ഇതോടെ പയ്യംന്പള്ളി കുറുക്കൻമൂല, പടമല പ്രദേശങ്ങളിലെ ജനങ്ങൾ ഏറെപ്രതിസന്ധിയിലായി.
കടുവയെ മയക്കുവെടിവയ്ക്കാൻ വെറ്ററിനറി സർജന്‍റെ ഡോ. അരുണ്‍ സക്കറിയുടെ നേതൃത്ത്വത്തിലുള്ള സംഘം സ്ഥലത്ത് ക്യാംപ് ചെയ്യുന്നുണ്ട്. കുറുക്കൻമൂലയിലും പരിസര പ്രദേശങ്ങളിലും രാവിലെ പാൽ അളക്കുന്ന സമയത്തും കുട്ടികൾ സ്കൂളിൽ പോകുന്ന സമയത്തും പോലീസിന്റെയും വനം വകുപ്പിന്‍റെയും പ്രത്യേക സ്വകാഡും സ്ഥലത്ത് ക്യാന്പ് ചെയ്യുന്നതിനും സബ് കളക്ടർ ആർ. ശ്രീലക്ഷ്മിയുടെ അധ്യക്ഷതയിൽ ചേർന്ന യോഗത്തിൽ തീരുമാനിച്ചിരുന്നു.
