09 November, 2021 04:22:38 PM
കൊച്ചി വാഹനാപകടം; ഹോട്ടൽ ദൃശ്യങ്ങളടങ്ങിയ ഹാർഡ് ഡിസ്ക് പോലീസ് കസ്റ്റഡിയിൽ
കൊച്ചി: ഫോര്‍ട്ട്‌കൊച്ചിയിലെ നമ്പര്‍ 18 ഹോട്ടലിലെ സിസിടിവി ദൃശ്യങ്ങളടങ്ങിയ ഹാര്‍ഡ് ഡിസ്ക് പോലീസിനു ലഭിച്ചു. മുന്‍മിസ് കേരള ഉള്‍പ്പടെ മൂന്ന് പേര്‍ മരിച്ച കാര്‍ അപകടവുമായി ബന്ധപ്പെട്ടാണ് പോലീസ് ഹോട്ടലില്‍ പരിശോധന നടത്തിയത്. എന്നാല്‍ ഹാര്‍ഡ് ഡിസ്‌ക്കിന്‍റെ പാസ്‌വേര്‍ഡ് അറിയില്ലെന്ന് ഹോട്ടല്‍ ജീവനക്കാര്‍ പോലീസിനെ അറിയിച്ചു. വരും ദിവസങ്ങളില്‍ ഹാര്‍ഡ് ഡിസ്ക് വിശദമായി പരിശോധിക്കുമെന്ന് പോലീസ് വ്യക്തമാക്കി.
ഇവിടെ നിന്നും ഡിജെ പാര്‍ട്ടി കഴിഞ്ഞ് മടങ്ങുമ്പോഴാണ് മുന്‍മിസ് കേരളയും മുന്‍ റണ്ണറപ്പും ഉള്‍പ്പടെ മൂന്ന് പേര്‍ മരിച്ചത്. സംഭവത്തില്‍ വാഹനമോടിച്ച മാള സ്വദേശിയെ പോലീസ് അറസ്റ്റ് ചെയ്തിരുന്നു. മദ്യപിച്ച് വാഹനമോടിച്ച് അപകടം വരുത്തിയതിനും മനപൂര്‍വമല്ലാത്ത നരഹത്യയ്ക്കുമാണ് ഇയാള്‍ക്കെതിരെ കേസെടുത്തത്.
