20 September, 2021 03:00:00 PM
ഭാഗ്യവാൻ കടലിനക്കരെയോ? ഓണം ബംപറിനു അവകാശവാദവുമായി പ്രവാസി
കോഴിക്കോട്: ഓണം ബംപറിന്‍റെ ഒന്നാം സമ്മാനം ലഭിച്ചുവെന്ന അവകാശവാദവുമായി പ്രവാസി രംഗത്ത്. സുഹൃത്ത് വഴി താൻ എടുത്ത ലോട്ടറിക്കാണ് 12 കോടി അടിച്ചതെന്ന് വയനാട് പനമരം സ്വദേശി സെയ്തലവി പറയുന്നു. എന്നാൽ ലോട്ടറി ടിക്കറ്റ് ഇയാളുടെ കൈവശമില്ല. സുഹൃത്തിന്‍റെ കൈവശമുള്ള ടിക്കറ്റ് ഇന്ന് തന്നെ തന്‍റെ കുടുംബത്തിന് കൈമാറുമെന്നാണ് സെയ്തലവി പറയുന്നത്.
കോഴിക്കോട് സ്വദേശിയായ സുഹൃത്തിന് ഗുഗിൾ പേ സംവിധാനം വഴി പണം അയച്ചുകൊടുത്താണ് ലോട്ടറി വാങ്ങിയതെന്ന് സെയ്തലവി പറയുന്നു. ഇക്കാര്യത്തിൽ ഇതുവരെ സ്ഥിരീകരണമുണ്ടായിട്ടില്ല. തൃപ്പൂണിത്തുറയിൽ വിറ്റ ലോട്ടറി ടിക്കറ്റിനാണ് ഒന്നാം സമ്മാനമെന്ന് ഞായറാഴ്ച തന്നെ സ്ഥിരീകരണം വന്നിരുന്നു. എന്നാൽ ഇതുവരെ ഭാഗ്യശാലിയെ കണ്ടെത്താൻ കഴിഞ്ഞിരുന്നില്ല.
