31 August, 2021 01:02:19 PM
മുവാറ്റുപുഴ തൃക്കളത്തൂർ അപകടം: മരണം നാലായി
മൂവാറ്റുപുഴ: എംസി റോഡിൽ തൃക്കളത്തൂർ കാവുംപടിയിലുണ്ടായ വാഹനാപകടത്തിൽ മരിച്ചവരുടെ എണ്ണം നാലായി. നേരത്തെ മരിച്ച ആദിത്യന്‍റെ സഹോദരൻ അമർനാഥ് ആർ. പിള്ള (20) ആണ് മരിച്ചത്. നേരത്തെ ആദിത്യന്‍ (23), വിഷ്ണു (25), അരുണ്‍ (22) എന്നിവർ മരിച്ചിരുന്നു. തിങ്കളാഴ്ച പുലർച്ചെ നാലോടെയായിരുന്നു അപകടം.
ബംഗളൂരുവില്‍നിന്നു കാറില്‍ നാട്ടിലേക്കു മടങ്ങുകയായിരുന്ന സഹോദരങ്ങളടക്കം ബന്ധുക്കളായ നാല് യുവാക്കളാണ് കാറിലുണ്ടായിരുന്നത്. മണ്ണുമാന്തി യന്ത്രം കയറ്റി തൃശൂരിലേക്കു പോവുകയായിരുന്ന ലോറിയുമായാണ് യുവാക്കളുടെ കാർ കൂട്ടിയിടിച്ചത്. അപകടത്തിൽ കാർ നിശേഷം തകർന്നു.
അമ്മാവനായ സുരേഷിനു രണ്ടു സെക്കൻഡ് ഹാൻഡ് കാറുകൾ വാങ്ങുന്നതിനായി സുരേഷിനും കുടുബത്തിനുമൊപ്പം വെള്ളിയാഴ്ചയാണു യുവാക്കള്‍ ബംഗളൂരുവിലേക്കു ട്രെയിനില്‍ യാത്ര തിരിച്ചത്. ഓണ്‍ലൈന്‍ വിപണിവഴി ബംഗളൂരുവില്‍നിന്നു രണ്ടു കാറുകള്‍ വാങ്ങി തിരികെ വരുന്ന വഴിക്കായിരുന്നു അപകടം. സുരേഷും കുടുംബവും മറ്റൊരു കാറില്‍ യുവാക്കളുടെ കാറിന്‍റെ പിന്നാലെയുണ്ടായിരുന്നു. സുരേഷിന്‍റെ സഹോദരിമാരുടെ മക്കളാണു യുവാക്കള്‍.
