30 May, 2021 11:44:02 AM
പള്ളുരുത്തിയിൽ കാണാതായ എഎസ്ഐ തിരികെയെത്തി: സിഐ മാനസികമായി പീഡിപ്പിച്ചെന്നു ആരോപണം
കൊച്ചി: എറണാകുളം പള്ളുരുത്തിയിൽ കാണാതായ എഎസ്ഐ തിരികെ വീട്ടിലെത്തി. ഹാർബർ പോലീസ് സ്റ്റേഷനിലെ ഉദ്യോഗസ്ഥനായ ഉത്തംകുമാറിനെ കാണാനില്ലെന്ന് ചൂണ്ടിക്കാട്ടി ഭാര്യയാണ് പരാതി നൽകിയിരുന്നത്.
ഉത്തംകുമാർ ഇന്ന് രാവിലെയാണ് തിരികെ വീട്ടിലെത്തിയത്. ഇതറിഞ്ഞ പോലീസ് വീട്ടിലെത്തി ഉത്തംകുമാറിനെ സ്റ്റേഷനിലേക്ക് കൊണ്ടു വന്നു. തനിക്ക് മാത്രമായി മെമ്മോ ലഭിച്ചതിന്‍റെ വിഷമത്തിൽ ആണ് നാട് വിട്ടതെന്ന് എഎസ്ഐ പറഞ്ഞതായി പള്ളുരുത്തി സിഐ പറഞ്ഞു.
ഗുരുവായൂർ ആയിരുന്നു എന്നാണ് എഎസ്ഐ മൊഴി നൽകിയത്. സ്‌ഥിരമായി താമസിച്ച് ഡ്യൂട്ടിക്ക് വരുന്നതിനാലാണ് ഉത്തംകുമാറിന് മെമ്മോ നൽകിയതെന്ന് സിഐ പറഞ്ഞു. ജോലിക്ക് വൈകി എത്തിയതിനു സിഐ മാനസികമായി പീഡിപ്പിച്ച മനോവിഷമത്തിലാണ് ഉത്തംകുമാർ നാടുവിട്ടതെന്നാണ് കുടുംബത്തിന്‍റെ ആരോപണം. എന്നാൽ ഈ ആരോപണം പോലീസ് തള്ളി.
