24 March, 2021 07:48:56 PM
ജീവനക്കാരിയുടെ ആത്മഹത്യ; കെഎസ്ആർടിസി ഉദ്യോഗസ്ഥനെ പിരിച്ചുവിട്ടു
അങ്കമാലി: കെഎസ്ആർടിസി അങ്കമാലി യൂണിറ്റിലെ ജീവനക്കാരിയായ സ്ത്രീയുടെ മരണവുമായി ബന്ധപ്പെട്ട് അങ്കമാലി യൂണിറ്റിലെ സെലക്ഷൻ ഗ്രേഡ് അസിസ്റ്റന്റ് ഐ പി ജോസിനെ സർവ്വീസിൽ നിന്നും പിരിച്ചു വിട്ടു. ഇയാള്‍ക്കെതിരെ വകുപ്പ് തലത്തിൽ നടത്തിയ അന്വേഷണത്തിൽ കുറ്റക്കാരനാണെന്ന് കണ്ടെത്തിയതിനെ തുടർന്നാണ് നടപടി.
2016 ൽ ജീവനക്കാരിയെ ഐപി ജോസ്, ഓഫീസിൽ വെച്ച് പീഡിപ്പിച്ച സംഭവത്തിൽ ജീവനക്കാരി അങ്കമാലി പൊലീസ് സ്റ്റേഷനിൽ പരാതി നൽകുകയും അതിൻപ്രകാരം 2130/16 എന്ന എഫ്ഐആർ നമ്പരിൽ കേസ് രജിസ്റ്റർ ചെയ്യുകയും ചെയ്തിരുന്നു. അന്വേഷണം നടക്കവെ 2016 നവംബർ 8 ന് ജീവനക്കാരി ആത്മഹത്യ ചെയ്യുകയായിരുന്നു.
തുടർന്ന് പൊലീസ് അറസ്റ്റ് ചെയ്‌ത ജോസിനെ സസ്പെൻഡ് ചെയ്‌ത് ഇയാൾക്ക് കെഎസ്ആർടിസി കുറ്റപത്രം നൽകുകയും ചെയ്തു. കുറ്റപത്രത്തിന് നൽകിയ മറുപടി തൃപ്‌തികരമല്ലാത്ത സാഹചര്യത്തിലാണ് നടപടി ക്രമം പൂർത്തീകരിച്ച് സർവ്വീസിൽ നിന്നും പിരിച്ചുവിടാൻ ഉത്തരവിട്ടത്.
