16 June, 2020 09:41:18 PM
ബിരിയാണി കഴിച്ചിട്ട് മുങ്ങിയ ബൈക്ക് മോഷ്ടാക്കളെ രണ്ടരകിലോമീറ്റര്‍ ഓടിച്ചിട്ട് പിടിച്ച് യുവതി
കൊച്ചി: ബിരിയാണി കഴിച്ച ശേഷം പണം നല്‍കാതെ മുങ്ങിയ യുവാക്കളെ ഓടിച്ചിട്ട് പിടിച്ച് ഹോട്ടലുടമയായ യുവതി. തിരുവാങ്കുളത്ത് ഹോട്ടല്‍ നടത്തുന്ന ഡല്‍സി ജേക്കബാണ് രണ്ടര കിലോമീറ്റര്‍ പിന്നാലെയോടി യുവാക്കളെ പിടികൂടിയത്. സംഭവത്തിന്റെ സി.സി.ടി.വി ദൃശ്യങ്ങള്‍ സാമൂഹ്യമാധ്യമങ്ങളില്‍ വൈറലായി.
ഡല്‍സി ജേക്കബിന്റെ കടയില്‍ ഇന്നലെ രാത്രി വന്ന രണ്ട് യുവാക്കള്‍ പണം നല്‍കാതെ മുങ്ങുകയായിരുന്നു. ഇന്ന് രാവിലെ യാദൃശ്ചികമായി ഡല്‍സി ഇവരെ കണ്ടുമുട്ടി. യുവാക്കളെ തടഞ്ഞ് നിര്‍ത്താന്‍ ശ്രമിച്ചുവെങ്കിലും അവര്‍ ഓടി. ഡല്‍സി വിട്ടില്ല. പിന്നാലെ ഓടി. രണ്ടര കിലോമീറ്റര്‍ ഓടിയതോടെ യുവാക്കളില്‍ ഒരാള്‍ ക്ഷീണിതനായി. ഇതോടെ ഇയാളെ ഡല്‍സി പിടികൂടി. പോലീസ് സ്‌റ്റേഷനില്‍ എത്തിച്ചതോടെ ഇവര്‍ നിരവധി മോഷണക്കേസുകളിലും പ്രതികളാണെന്ന് വ്യക്തമായി. മോഷ്ടിച്ച ബൈക്കും ഇവരില്‍ നിന്ന് കണ്ടെടുത്തു.
