27 November, 2019 12:32:53 PM
യുവതിയുടെയും കുഞ്ഞിന്‍റെയും ദുരൂഹമരണം: ഭര്‍ത്താവും ഭര്‍തൃമാതാവും അറസ്റ്റില്‍
കോഴിക്കോട്: വെള്ളന്നൂരില്‍ യുവതിയും കുഞ്ഞും ഭര്‍തൃവീട്ടിലെ കിണറില്‍ മരിച്ച കേസില്‍ ഭര്‍ത്താവും ഭര്‍തൃമാതാവും അറസ്റ്റില്‍. ചാത്തമംഗലം സ്വദേശി രഖിലേഷ്, അമ്മ ലളിത എന്നിവരെയാണു പോലീസ് അറസ്റ്റ് ചെയ്തത്. ആത്മഹത്യയാണെന്നായിരുന്നു പോലീസിന്‍റെ പ്രാഥമിക നിഗമനമെങ്കിലും കൊലപാതകമാണെന്ന ബന്ധുക്കളുടെ പരാതി കണക്കിലെടുത്താണ് അന്വേഷണം നടത്തിയത്.
നവംബര്‍ പതിനൊന്നിനാണ് കീഴരിയൂര്‍ സ്വദേശി നിജിന, എട്ടു മാസം പ്രായമുള്ള മകന്‍ എന്നിവരെയാണു ഭര്‍തൃവീട്ടിലെ കിണറില്‍ ദുരൂഹ സാഹചര്യത്തില്‍ കണ്ടെത്തിയത്. സ്ത്രീധനത്തിന്‍റെ പേരില്‍ നിജിനയെ ഭര്‍തൃമാതാവ് നിരന്തരം മാനസികമായി പീഡിപ്പിച്ചിരുന്നുവെന്നും മരണത്തില്‍ ദുരൂഹതയുണ്ടെന്നും കാണിച്ചു യുവതിയുടെ കുടുംബം പോലീസില്‍ പരാതി നല്‍കിയിരുന്നു.
സംഭവം നടന്ന് രണ്ടാഴ്ച പിന്നിട്ടിട്ടും ഒളിവില്‍ കഴിയുന്ന ഭര്‍ത്താവ് രഖിലേഷിനേയോ രക്ഷിതാക്കളേയോ കണ്ടെത്താന്‍ പോലീസിനു കഴിഞ്ഞിരുന്നില്ല. കോഴിക്കോട് നോര്‍ത്ത് എസിപിയുടെ നേതൃത്വത്തിലാണ് അന്വേഷണം പുരോഗമിക്കുന്നത്. നിജിനയെ സ്ത്രീധനത്തിന്‍റെ പേരില്‍ ഭര്‍തൃമാതാവ് മാനസികമായി പീഡിപ്പിച്ചിരുന്നുവെന്ന് പോലീസ് കണ്ടെത്തിയിട്ടുണ്ട്.
