10 November, 2022 02:22:03 PM
കത്ത് വിവാദം; മേയര്‍ ആര്യാ രാജേന്ദ്രനും സർക്കാരിനും ഹൈക്കോടതി നോട്ടീസ്
കൊച്ചി: കത്ത് വിവാദത്തില്‍ വിശദീകരണം ആവശ്യപ്പെട്ട് മേയര്‍ ആര്യാ രാജേന്ദ്രന് ഹൈക്കോടതി നോട്ടീസയച്ചു. പാര്‍ലമെന്‍ററി പാര്‍ട്ടി നേതാവ് ഡി.ആര്‍.അനിലിനും സംസ്ഥാന സര്‍ക്കാരിനും കോടതി നോട്ടീസയച്ചിട്ടുണ്ട്. ഹര്‍ജി ഈ മാസം 25ന് വീണ്ടും പരിഗണിക്കും. സംഭവത്തില്‍ അന്വേഷണം ആവശ്യപ്പെട്ടുള്ള ഹര്‍ജിയിലാണ് കോടതി നടപടി. കത്ത് വിവാദവുമായി ബന്ധപ്പെട്ട് കേസ് രജിസ്റ്റര്‍ ചെയ്തിട്ടുണ്ടോ എന്നു കോടതി ആരാഞ്ഞു. വിഷയത്തില്‍ പരിശോധന നടക്കുന്നുണ്ടെന്നും ഇപ്പോഴുള്ളത് രാഷ്ട്രീയവിരോധം മൂലമുള്ള ആരോപണങ്ങള്‍ മാത്രമാണെന്നും സര്‍ക്കാര്‍ കോടതിയില്‍ പറഞ്ഞു.
മേയര്‍ക്ക് നോട്ടീസ് നല്‍കുന്നതിനെ സംസ്ഥാന സര്‍ക്കാര്‍ എതിര്‍ത്തെങ്കിലും ഇത് കോടതി അംഗീകരിച്ചില്ല. മേയര്‍ക്കെതിരെയുള്ള ആരോപണമായതിനാല്‍ മേയർതന്നെ വിശദീകരണം നല്‍കണമെന്ന് കോടതി പറഞ്ഞു. രണ്ട് വര്‍ഷത്തിനിടയില്‍ തിരുവനന്തപുരം കോര്‍പ്പറേഷനില്‍ നിരവധി അനധികൃത നിയമനം നടന്നിട്ടുണ്ടെന്നും ഇക്കാര്യത്തില്‍ ജുഡീഷ്യല്‍ അന്വേഷണമോ സിബിഐ അന്വേഷണമോ വേണമെന്നാവശ്യപ്പെട്ട് മുന്‍ കൗണ്‍സിലര്‍ ജി.എസ്.ശ്രീകുമാറാണ് ഹൈക്കോടതിയെ സമീപിച്ചത്.
