08 July, 2020 06:40:13 PM
നുവാൽസിൽ നൈപുണ്യ അധിഷ്ഠിത പഠന രീതി ഈ അദ്ധ്യയന വർഷം മുതൽ
കൊച്ചി: പഠിതാക്കളുടെ നൈപുണ്യ വികസനത്തിനു പ്രാധാന്യം കൊടുക്കുന്ന പുതിയ പഠന രീതി ഈ അദ്ധ്യയന വർഷം മുതൽ എൽ.എൽ.ബി. തലത്തിൽ നുവാൽസിൽ നടപ്പിലാക്കും . അഭിഭാഷകർ, ന്യായാധിപർ , നിയമ അദ്ധ്യാപകർ, ബിസിനസ് അഭിഭാഷകർ, സർക്കാർ, പൊതുമേഖലാ സ്ഥാപനങ്ങളിലെ നിയമ ഉപദേശകർ, സാമൂഹ്യ സേവകർ തുടങ്ങി ഏതു മേഖലയിൽ പോയാലും നിയമം ഫലപ്രദമായി കൈകാര്യം ചെയ്യാൻ ആവശ്യമായ നൂറിൽപ്പരം നൈപുണ്യങ്ങൾ ആർജ്ജിക്കാൻ വിദ്യാർഥികളെ പ്രാപ്തരാക്കുകയാണ് ഈ പഠന രീതിയുടെ ഉദ്ദേശ്യം.
ഓരോ സെമസ്റ്ററിലും പത്തു മുതൽ പതിനഞ്ചു വരെ നൈപുണ്യങ്ങളിൽ പ്രാവീണ്യം നേടുന്നതിനുള്ള പരിപാടികൾ പാഠ്യപദ്ധതിയുടെ ഭാഗമായി സംഘടിപ്പിക്കും . അമേരിക്കൻ ബാർ അസോസിയേഷൻ, ലോക ആരോഗ്യ സംഘടന തുടങ്ങിയ സ്ഥാപനങ്ങൾ കണ്ടെത്തിയിട്ടുള്ള നൈപുണ്യങ്ങൾ, വിദ്യാഭ്യാസ വിദഗ്ധരായ ബഞ്ചമിൻ ബ്ലൂം , പൗലോ ഫ്രയർ, മാനവശേഷി വിദഗ്ധനായ പോൾ ജി. സ്റ്റോഴ്സ് എന്നിവരുടെ സിദ്ധാന്തങ്ങൾ , ഹാർവാർഡ് ലോ സ്കൂൾ ഉൾപ്പെടെയുള്ള ലോകോത്തര സർവകലാശാലകളിലെ ബോധന രീതികൾ എന്നിവ അടിസ്ഥാനടപ്പെുത്തിയാണ് പുതിയ പഠന രീതി വിഭാവനം ചെയ്തിരിക്കുന്നത്.
നുവാൽസ് വൈസ് ചാൻസലർ ഡോ കെ . സി. സണ്ണിയുടെ അധ്യക്ഷതയിൽ ചേർന്ന അക്കാഡമിക്ക് കൗൺസിൽ യോഗത്തിൽ ഒറീസ നിയമ സർവകലാശാല വൈസ് ചാൻസിലർ ഡോ ശ്രീകൃഷ്ണ റാവു , മഹാരാഷ്ട്ര നിയമ സർവകലാശാല വൈസ് ചാൻസിലർ ഡോ . വിജന്ദർ കുമാർ, ഓസ്മാനിയ സർവകലാശാല നിയമ വിഭാഗം ഡീൻ ഡോ . ജി. ബി.റെഡ്ഡി, മൈസൂർ സർവകലാശാല നിയമ വിഭാഗം ഡീൻ പ്രൊഫ സി. ബസവരാജു, ഹൈക്കോടതി അഭിഭാഷകരായ ഡോ കെ ബി. ഇബ്രാഹിംകുട്ടി , അഡ്വ നാഗരാജ് നാരായൺ , കുസാറ്റ് നിയമ വകുപ്പ്അദ്ധ്യക്ഷ ഡോ . വാണി കേസരി , നുവാൽസ് അധ്യാപകർ ആയ ഡോ . ഷീബ. എസ്. ധർ, ഡോ . ജേക്കബ് ജോസഫ്, രജിസ്‌ട്രാർ എം.ജി. മഹാദേവ് എന്നിവർ പങ്കെടുത്തു .
