28 April, 2020 03:39:38 PM
'നഗ്നമായ ഭീതി'; സുരക്ഷാകിറ്റുകള്‍ക്കായി ഡോക്ടർമാര് പ്രതിഷേധിച്ചത് നഗ്നരായി
ബെർലിൻ: കോവിഡിനെതിരായ യുദ്ധത്തില്‍ ആവശ്യത്തിന് സുരക്ഷാ കിറ്റുകളില്ലാതെ അപകടകരമായി ജോലി ചെയ്യേണ്ട അവസ്ഥയിലായ ഡോക്ടർമാർ വേറിട്ട പ്രതിഷേധവുമായി രംഗത്ത്. തങ്ങളുടെ നിസഹായാവസ്ഥ തുറന്ന് കാണിക്കാൻ നഗ്നരായി ഫോട്ടോ എടുത്താണ് ജർമനിയിലെ ഡോക്ടർമാർ പ്രതിഷേധിച്ചത്. മാസങ്ങളായി തങ്ങളുന്നയിക്കുന്ന ആവശ്യം അധികൃതർ ചെവികൊള്ളുന്നില്ലെന്നാണ് ഡോക്ടർമാർ പറയുന്നത്. അധികൃതരുടെ ശ്രദ്ധ പതിയാനാണ് വേറിട്ട പ്രതിഷേധമാർഗം തെരഞ്ഞെടുത്തത്.
'നഗ്നമായ ഭീതി' എന്ന പേരിലാണ് ഈ പ്രചാരണം. പരിശോധനാ ഉപകരണങ്ങളുടെയോ കേസ് ഫയലുകളുടെയോ ചെറിയ മറവ് മാത്രം ഉപയോഗപ്പെടുത്തി വസ്ത്രങ്ങൾ ധരിക്കാതെയാണ് ഡോക്ടർമാർ ചിത്രങ്ങളെടുത്ത് പങ്ക് വെച്ചത്. കോവിഡ് പ്രതിരോധത്തിൽ ഡോക്ടർമാർ ചാവേറുകളാകുന്നു എന്ന് സൂചിപ്പിച്ച് ഫ്രഞ്ച് ഡോക്ടർ അലൻ കൊളംബി നേരത്തെ നഗ്ന ഫോട്ടോ പങ്കുവെച്ചിരുന്നു. ഇതിൽ നിന്ന് പ്രചോദനം ഉൾക്കൊണ്ടായിരുന്നു ജർമൻ ഡോക്ടർമാരുടെ പ്രതിഷേധം.
