17 February, 2017 05:33:26 PM
അധികാരമേൽക്കുന്നതിന് മുമ്പ് തന്നെ ഉൗർജിത് പട്ടേലിന്‍റെ ഒപ്പ് 2000 രൂപ നോട്ടിൽ അച്ചടിച്ചു
ദില്ലി: റിസർവ് ബാങ്ക് ഗവർണറായി അധികാരമേൽക്കുന്നതിന് മുമ്പ് തന്നെ 2000 രൂപ നോട്ടിൽ ഉൗർജിത് പട്ടേലിന്‍റെ ഒപ്പ്. ആഗസ്റ്റ് 22നാണ് റിസർവ് ബാങ്ക് പുതിയ 2000 രൂപ നോട്ടുകളുടെ അച്ചടി ആരംഭിച്ചത്. അച്ചടി ആരംഭിക്കുമ്പോൾ രഘുറാം രാജനായിരുന്നു റിസർവ് ബാങ്ക് ഗവർണർ. സെപ്തംബർ നാലിനാണ് പുതിയ ഗവർണറായി ഉൗർജിത് പട്ടേൽ ചുമതലയേറ്റത്. അങ്ങനെയെങ്കിൽ 2000 രൂപ നോട്ടുകളിൽ വരേണ്ടിയിരുന്നത് അന്ന് റിസർവ് ബാങ്ക് ഗവർണറായ രഘുറാം രാജന്‍റെ ഒപ്പായിരുന്നു.
ഇൗ വിഷയത്തിൽ വ്യക്തത വരുത്താൻ റിസർവ് ബാങ്കിന് പലരും അയച്ച മെയിലുകൾക്ക് ഇതുവരെയായിട്ടും ബാങ്ക് മറുപടി നൽകിട്ടിയില്ലെന്നതും സംഭവത്തിന്‍റെ ദുരൂഹത വർധിപ്പിക്കുന്നു. 2000 രൂപ നോട്ടുകൾ അച്ചടിക്കാനുള്ള നടപടികൾ ജൂണിൽ തന്നെ ആരംഭിച്ചതായി സർക്കാർ പാർലമെൻറിൽ വ്യക്തമാക്കിയിരുന്നു.അച്ചടി തുടങ്ങി ആഴ്ചകൾക്ക് ശേഷമാണ് റിസർവ് ബാങ്ക് ഗവർണറായി ഉൗർജിത് പട്ടേൽ ചുമതല ഏറ്റെടുത്തിരിക്കുന്നത്.
നവംബർ 23ന് മാത്രമാണ് പുതിയ 500 രൂപ നോട്ടുകളുടെ അച്ചടി ആരംഭിച്ചിരിക്കുന്നത്. നോട്ട് പിൻവലിക്കൽ മൂലം ഉണ്ടായ കറൻസി ക്ഷാമത്തിന് ഒരു പരിധി വരെ കാരണം 500 രൂപ നോട്ടുകൾ അച്ചടിക്കാൻ വൈകിയതാണ്. 2000 രൂപ നോട്ടുമായി ബന്ധപ്പെട്ട് ഇതിനകം തന്നെ നിരവധി വിവാദങ്ങൾ ഉയർന്ന് വന്നു കഴിഞ്ഞു.
