09 November, 2026 03:42:31 PM
മദ്യപിച്ച് വാഹനം ഓടിച്ച കെഎസ്ആർടിസി ബസ് ഡ്രൈവർ അറസ്റ്റിൽ
വണ്ടിപ്പെരിയാർ: മദ്യലഹരിയിൽ അമിതവേഗത്തിൽ വാഹനം ഓടിച്ച കെഎസ്ആർടിസി ബസ് ഡ്രൈവർ അറസ്റ്റിൽ. കുമളിയിൽ നിന്നും രാവിലെ കോട്ടയത്തേക്ക് പുറപ്പെട്ട ബസിലെ ഡ്രൈവർ വിനീഷ് കുമാറാണ് വണ്ടിപ്പെരിയാർ പൊലീസിന്റെ പിടിയിലായത്. ബസിലുണ്ടായിരുന്ന 45 യാത്രക്കാരുടെ ജീവനാണ് തലനാരിഴയ്ക്കാണ് രക്ഷപ്പെട്ടത്.
യാത്ര ആരംഭിച്ചതുമുതൽ ബസിന്റെ നിയന്ത്രണം നഷ്ടപ്പെടുന്ന രീതിയിലായിരുന്നു ഡ്രൈവറുടെ പെരുമാറ്റം. ചോറ്റുപാറയിലും നെല്ലിമലയിലും എത്തിയപ്പോൾ എതിരെ വന്ന വാഹനങ്ങളിൽ ഇടിക്കാൻ പോകുന്ന രീതിയിൽ അമിതവേഗത്തിലും നിയന്ത്രണം തെറ്റിയുമാണ് ബസ് കടന്നുപോയത്. വാഹനത്തിന്റെ നിയന്ത്രണം നഷ്ടപ്പെട്ടപ്പോൾ യാത്രക്കാർ വിവരം തിരക്കിയെങ്കിലും ഡ്രൈവർ അത് വകവച്ചില്ല. തനിക്ക് കുഴപ്പമൊന്നുമില്ലെന്നായിരുന്നു വിനീഷ് കുമാർ മറുപടി നൽകിയത്.
എന്നാൽ വണ്ടിപ്പെരിയാറിൽ എത്തിയപ്പോൾ വീണ്ടും വാഹനം നിയന്ത്രണം വിട്ടതോടെ മുൻഭാഗത്തിരുന്ന യാത്രക്കാർ ഇടപെടുകയായിരുന്നു. തുടർന്ന് യാത്രക്കാരുടെ നിർബന്ധത്തിന് വഴങ്ങി ബസ് വഴിയരികിൽ നിർത്താൻ ഡ്രൈവർ തയാറായി. ഉടൻ തന്നെ യാത്രക്കാർ ബസിന്റെ താക്കോൽ ഊരിമാറ്റി നാട്ടുകാരുടെ സഹായത്തോടെ പൊലീസിൽ വിവരമറിയിക്കുകയുമായിരുന്നു.
സ്ഥലത്തെത്തിയ വണ്ടിപ്പെരിയാർ പൊലീസ് ഇയാളെ കസ്റ്റഡിയിലെടുത്തു. തുടർന്ന് നടത്തിയ വൈദ്യപരിശോധനയിൽ ഇയാൾ അമിതമായി മദ്യപിച്ചിരുന്നതായി സ്ഥിരീകരിച്ചു. പിന്നീട് കുമളി ഡിപ്പോയിൽ നിന്ന് മറ്റൊരു ഡ്രൈവറെ എത്തിച്ചാണ് യാത്രക്കാരുമായി ബസ് കോട്ടയത്തേക്ക് യാത്ര തുടർന്നത്.
