07 November, 2026 12:10:24 PM
റെയിൽവേ ട്രാക്ക് മുറിച്ച് കടക്കുന്നത് ക്രിമിനൽ കുറ്റം; അപകടം സംഭവിച്ചാൽ നഷ്ടപരിഹാരമില്ലെന്ന് ട്രൈബ്യൂണൽ
കൊച്ചി: റെയിൽവേ ട്രാക്ക് മുറിച്ചുകടക്കുന്നതിനിടെ ട്രെയിനിടിച്ച് പരിക്കേറ്റയാൾക്ക് നഷ്ടപരിഹാരം അനുവദിക്കാനാകില്ലെന്ന് എറണാകുളം റെയിൽവേ ക്ലെയിംസ് ട്രിബ്യൂണൽ. റെയിൽവേ നിയമപ്രകാരം അനുവാദമില്ലാതെ ട്രാക്ക് മുറിച്ചുകടക്കുന്നത് ക്രിമിനൽ കുറ്റമാണെന്ന് ചൂണ്ടിക്കാട്ടിയാണ് ട്രിബ്യൂണലിന്റെ നടപടി.
മാവേലിക്കര റെയിൽവേ സ്റ്റേഷനിലുണ്ടായ അപകടത്തിൽ ഗുരുതരമായി പരിക്കേറ്റ ചങ്ങനാശ്ശേരി സ്വദേശി സമർപ്പിച്ച നഷ്ടപരിഹാര ഹർജിയാണ് തള്ളിയത്. 2023 മേയ് എട്ടിനാണ് കേസിനാസ്പദമായ സംഭവം നടന്നത്. മാവേലിക്കര റെയിൽവേ സ്റ്റേഷനിലെ രണ്ടാം നമ്പർ പ്ലാറ്റ്‌ഫോമിൽ നിർത്തിയിട്ടിരുന്ന കൊല്ലം–എറണാകുളം മെമു ട്രെയിനിൽ കയറുന്നതിനായി തോമസ് ജോൺ കിഴക്കുഭാഗത്തുനിന്ന് ട്രാക്ക് മുറിച്ചുകടക്കുകയായിരുന്നു.
ഇതിനിടെ മൂന്നാം നമ്പർ പ്ലാറ്റ്‌ഫോമിലേക്ക് എത്തിയ ശബരി എക്സ്പ്രസ് ഇടിച്ചാണ് അപകടമുണ്ടായത്. കൊല്ലം–എറണാകുളം മെമു ട്രെയിനിൽ യാത്ര ചെയ്യുന്നതിനിടെ തിരക്കുമൂലം പുറത്തേക്ക് വീണാണ് പരിക്കേറ്റതെന്നായിരുന്നു തോമസ് ജോൺ ട്രിബ്യൂണലിൽ അവകാശപ്പെട്ടത്. എന്നാൽ റെയിൽവേ ഈ വാദം ശക്തമായി എതിർത്തു.
