16 January, 2026 10:04:49 AM
തൃശൂരിൽ അയ്യപ്പഭക്തർ സഞ്ചരിച്ച ബസും പിക്കപ്പ് വാനും കൂട്ടിയിടിച്ച് അപകടം; 17 പേർക്ക് പരിക്ക്
തൃശ്ശൂർ: കേച്ചേരി-അക്കിക്കാവ് ബൈപാസിലെ പന്നിത്തടം കവലയിൽ മലയാളികളായ അയ്യപ്പഭക്തർ സഞ്ചരിച്ചിരുന്ന ബസും പിക്കപ്പ് വാനും കൂട്ടിയിടിച്ച് 17 പേർക്ക് പരിക്ക്. ഇരുവാഹനങ്ങളും ഇടിച്ചയുടൻ മറിഞ്ഞു. ബസ്സിലുള്ളവർക്കാണ് പരിക്കേറ്റത്. ഇവരെ കുന്നംകുളത്തെ ആശുപത്രിയിൽ പ്രവേശിപ്പിച്ചു. ആർക്കും ഗുരുതരമായ പരിക്കില്ല. വെള്ളിയാഴ്ച പുലർച്ചെ 5.10-നാണ് അപകടം നടന്നത്. ബൈപ്പാസിലൂടെ എത്തിയ ബസ്സും വടക്കാഞ്ചേരി-ചാവക്കാട് സംസ്ഥാന പാതയിലൂടെ വരികയായിരുന്ന പിക്കപ്പ് വാനുമാണ് കൂട്ടിയിടിച്ചത്. എരുമപ്പെട്ടി പോലീസും കുന്നംകുളം അഗ്നിരക്ഷാ സേനയും ചേർന്ന് വാഹനങ്ങൾ മാറ്റി. റോഡിൽ ഒഴുകിയ ഓയിൽ കഴുകി വൃത്തിയാക്കി ഗതാഗതം പുനഃസ്ഥാപിച്ചു.
