25 February, 2021 02:18:08 PM
'കേരളത്തെക്കുറിച്ച് പറയുന്നതില്‍ എന്താണ് തെറ്റ്'; രാഹുലിനെ ന്യായീകരിച്ച് വേണുഗോപാൽ
തിരുവനന്തപുരം: കേരളത്തിലെ വോട്ടർമാർ വടക്കേ ഇന്ത്യയിൽ നിന്ന് വ്യത്യസ്തമെന്ന രാഹുൽ ഗാന്ധിയുടെ പരാമർശം വിവാദമാക്കേണ്ട കാര്യമില്ലെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ. പ്രസംഗത്തിൽ മറ്റൊരു സംസ്ഥാനത്തെയും രാഹുൽ മോശമാക്കിയിട്ടില്ല. രാഹുലിന്‍റെ പ്രസ്താവന വളച്ചൊടിക്കുകയായിരുന്നു.
അതേസമയം, രാഹുലിന്‍റെ പ്രസ്താവനയിൽ കോൺഗ്രസിൽ അതൃപ്തിയില്ലെന്നും കെ.സി. വേണുഗോപാൽ വ്യക്തമാക്കി. ബിജെപി നേതാക്കൾക്ക് പിന്നാലെ കോൺഗ്രസിലെ മുതിർന്ന നേതാവ് കപിൽ സിബലും രാഹുലിനെതിരെ രംഗത്തെത്തിയതിലാണ് വേണുഗോപാൽ മറുപടി നൽകിയത്. കോവിഡ് കാലത്ത് അമേത്തിയിൽ ഏറ്റവുമധികം സഹായമെത്തിച്ചത് രാഹുലാണെന്നും വേണുഗോപാൽ പറഞ്ഞു.
