17 January, 2021 10:33:17 AM
മലബാർ എക്സ്പ്രസിൽ തീപിടിത്തം: യാത്രക്കാർ ചങ്ങല വലിച്ചു; ഒഴിവായത് വൻദുരന്തം
തിരുവനന്തപുരം: മലബാർ എക്സ്പ്രസിൽ തീപിടിത്തമുണ്ടായി. എൻജിന് തൊട്ടുപിന്നിലെ പാഴ്സൽ ബോഗിക്കാണ് തീപിടിച്ചത്. തീ ശ്രദ്ധയില്‍പ്പെട്ട യാത്രക്കാര്‍ ചങ്ങല വലിച്ച് തീവണ്ടി നിര്‍ത്തുകയായിരുന്നു. ഉടന്‍ തീയണച്ചതിനാല്‍ വന്‍ ദുരന്തം ഒഴിവായി.
രാവിലെ 7.45 ഓടുകൂടിയാണ് സംഭവം. യാത്രക്കാരാണ് പുക ഉയരുന്നത് ആദ്യം കാണുന്നത്. ഉടന്‍ തന്നെ ചങ്ങല വലിച്ച് റെയില്‍വേ അധികൃതരെ വിവരമറിയിക്കുകയായിരുന്നു. വര്‍ക്കല ഇടവയിൽ തീവണ്ടി നിര്‍ത്തിയിട്ടിരിക്കുകയാണ്.
യാത്രക്കാരെ തീവണ്ടിയില്‍ നിന്ന് പുറത്തേക്കിറക്കി.എങ്ങനെയാണ് തീപടർന്നത് എന്ന് വ്യക്തമല്ല. ആളപായമില്ലെന്നും യാത്രക്കാർ എല്ലാവരും സുരക്ഷിതരാണെന്നുമാണ് വിവരം
