14 January, 2020 07:44:23 PM
വോട്ടർ പട്ടിക തയാറാക്കൽ: തെരഞ്ഞെടുപ്പ് കമ്മീഷന് ഹൈക്കോടതി നോട്ടീസ്
കൊച്ചി: സംസ്ഥാനത്ത് വരുന്ന തദ്ദേശ തെരഞ്ഞെടുപ്പിൽ 2015ലെ വോട്ടർ പട്ടിക പ്രകാരം കരട് വോട്ടർ പട്ടിക തയാറാക്കുന്നതിനെതിരായ ഹർജിയിൽ തെരഞ്ഞെടുപ്പ് കമ്മീഷന് ഹൈക്കോടതി നോട്ടീസ്. 2019ലെ വോട്ടർ പട്ടിക നിലനിൽക്കെ 2015ൽ പഞ്ചായത്ത് തെരഞ്ഞെടുപ്പിൽ ഉപയോഗിച്ച പട്ടിക അടിസ്ഥാനമാക്കുന്നതിന്‍റെ കാരണം വ്യക്തമാക്കാനാണ് നിർദേശം. വിശദീകരണം രണ്ടാഴ്ചയ്ക്കകം സമർപ്പിക്കണമെന്നും നിർദേശിച്ചിട്ടുണ്ട്.
നാദാപുരത്തെ മുസ്‌ലീം ലീഗ് നേതാക്കൾ നൽകിയ ഹർജിയിലാണ് ഹൈക്കോടതി നോട്ടീസ് അയച്ചത്. അതേസമയം, തദ്ദേശതെരഞ്ഞെടുപ്പിൽ 2015ലെ വോട്ടർ പട്ടിക ഉപയോഗിക്കുന്നതിൽ കമ്മീഷന് സർക്കാരിന്‍റെ പിന്തുണയും ലഭിച്ചു. കമ്മീഷന്‍റെ തീരുമാനമാണ് അന്തിമമെന്നും അതുമായി മുന്നോട്ടു പോകുകയാണെന്നും മന്ത്രി എ.സി. മൊയ്തീൻ അറിയിച്ചു. എന്നാൽ, ഈ നീക്കത്തെ ശക്തമായി എതിർക്കുമെന്ന് പ്രതിപക്ഷനേതാവ് രമേശ് ചെന്നിത്തലയും പറഞ്ഞു.
