01 November, 2022 08:58:00 PM
വനിതഡോക്ടറോട് ലൈംഗിക അതിക്രമം; മന്ത്രിയുടെ പ്രൈവറ്റ് സെക്രട്ടറിയുടെ ഡ്രൈവര്‍ കസ്റ്റഡിയില്‍
തിരുവനന്തപുരം: മ്യൂസിയം വളപ്പിൽ പ്രഭാത നടത്തത്തിനെത്തിയ വനിതാ ഡോക്ടറെ ലൈംഗികമായി ആക്രമിച്ച സംഭവത്തിൽ പ്രതിയെന്നു സംശയിക്കുന്ന യുവാവ് പൊലീസ് കസ്റ്റഡിയിൽ. മന്ത്രി റോഷി അഗസ്റ്റിന്‍റെ സ്റ്റാഫ് അംഗത്തിന്‍റെ ഡ്രൈവറെയാണ് കസ്റ്റഡിയിലെടുത്തത്. ഇയാളെ ചോദ്യം ചെയ്തുവരികയാണ്. മലയിൻകീഴ് സ്വദേശിയാണ് കസ്റ്റഡിയിലുള്ളത്. എന്നാൽ പ്രതി ഇയാൾ തന്നെയാണോയെന്ന് പോലീസിന് ഇതുവരെ ഉറപ്പിക്കാനായിട്ടില്ല.
അതേസമയം, ഇയാൾ കസ്റ്റഡിയിലായിരിക്കുന്നത് കുറവൻകോണത്ത് വീട്ടിൽ അതിക്രമിച്ചു കയറിയ കേസിലെന്നും റിപ്പോർട്ട്‌. ഇയാൾ സഞ്ചരിച്ച വാഹനം കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ പോലീസ് കസ്റ്റഡിയിലെടുത്തത്. ഇന്നോവ വാഹനം കവടിയാര്‍ പരിസരത്ത് പാര്‍ക്ക് ചെയ്ത ശേഷം കുറവന്‍കോണത്തെ വീട്ടിലേക്ക് അതിക്രമിച്ചു കയറുന്ന സിസിടിവി ദൃശ്യം ലഭിച്ചിരുന്നു. കന്‍റോൺമെന്‍റ് പോലീസ് ഇയാളെ ചോദ്യം ചെയ്തുവരികയാണ്.
ഇയാൾ ഇന്നലെ മുതൽ പോലീസ് നിരീക്ഷണത്തിൽ ആയിരുന്നു. കഴിഞ്ഞ ബുധനാഴ്ച രാവിലെയാണ് സ്ത്രീക്ക് നേരെ മ്യൂസിയം വളപ്പിനുളളിൽ വെച്ച് ലൈംഗികാതിക്രമം ഉണ്ടായത്. പ്രതിയെന്ന് സംശയിക്കുന്ന ആളുടെ രേഖാചിത്രം പൊലീസ് പുറത്തുവിട്ടിരുന്നു. സംഭവത്തിന്‍റെ സിസിടിവി ദൃശ്യങ്ങൾ പുറത്തുവന്നിരുന്നു.
