02 October, 2022 01:32:09 PM
മൂർഖനെ ചുംബിക്കാൻ ശ്രമിക്കുന്നതിനിടെ യുവാവിന് ചുണ്ടിൽ കടിയേറ്റു
ഷിമോഗ: മൂർഖൻ പാമ്പിനെ ചുംബിക്കാൻ ശ്രമിക്കുന്നതിനിടെ പാമ്പ് പിടുത്തക്കാരനായ യുവാവിന് കടിയേറ്റു. ജനവാസ മേഖലയിൽ നിന്നും പാമ്പിനെ പിടികൂടിയ ശേഷം തലയിൽ ചുംബിക്കാൻ ശ്രമിക്കുന്നതിനിടെയാണ് ചുണ്ടിൽ കടിയേറ്റത്. കർണാടക ഷിമോഗ ജില്ലയിലെ ഭദ്രാവതിയിലെ ബൊമ്മനകട്ടെയിലാണ് സംഭവം.
ഇതിന്‍റെ വീഡിയോ സോഷ്യൽ മീഡിയയിൽ പ്രചരിക്കുന്നുണ്ട്. യുവാവ് പാമ്പിനെ ചുംബിക്കാൻ ശ്രമിക്കുന്നതും, മൂർഖൻ പൊടുന്നനെ തിരിഞ്ഞ് ചുണ്ടിൽ കടിക്കുന്നതും 30 സെക്കൻഡ് ദൈർഘ്യമുള്ള ക്ലിപ്പിൽ കാണാം. കടിയേറ്റ ശേഷം യുവാവ് പാമ്പിനെ വലിച്ചെറിയുന്നതും മൂർഖൻ ഇഴഞ്ഞു നീങ്ങുന്നതും ദൃശ്യങ്ങളിൽ ഉണ്ട്.
മറ്റുള്ളവർ പാമ്പിനെ പിടിക്കാൻ ശ്രമിച്ചെങ്കിലും മൂർഖൻ രക്ഷപ്പെട്ടു. യുവാവ് അപകടനില തരണം ചെയ്തുവെന്നാണ് വിവരം. സോഷ്യൽ മീഡിയയിൽ വീഡിയോ പ്രചരിച്ചതോടെ യുവാവിൻ്റെ പ്രവൃത്തിയെ വിമർശിച്ച് നിരവധി പേർ രംഗത്തെത്തി. ഇയാൾക്കെതിരെ കേസെടുക്കണമെന്ന ആവശ്യവും ഉയര്‍ന്നിട്ടുണ്ട്.
