31 August, 2022 07:23:56 AM
ട്രക്ക് മറിഞ്ഞു; റോഡിൽ ചിതറി വീണ തക്കാളികൾ വീണ്ടും അപകടങ്ങള്‍ക്ക് കാരണമായി
കലിഫോർണിയ: യുഎസ് സംസ്ഥാനമായ കലിഫോർണിയയിലെ തിരക്കേറിയ ഹൈവേയിൽ ചിതറിവീണ് ടൺ കണക്കിന് തക്കാളി. തിങ്കളാഴ്ച രാവിലെ അന്തർസംസ്ഥാന 80 ഹൈവേയില്‍ തക്കാളി കയറ്റിയെത്തിയ ട്രക്ക് നിയന്ത്രണം വിട്ട് റോഡിൽ ഡിവൈഡറിൽ തട്ടി മറിയുകയായിരുന്നു. റോഡിൽ തെറിച്ചുവീണ തക്കാളി ഏഴ് കാറുകളെ അപകടത്തിലാക്കുകയും ചെയ്തു. തക്കാളികളുടെ മുകളിലൂടെ കയറിയിറങ്ങിയ കാറുകൾ തെന്നിമാറി.
അപകടത്തിൽ നാല് പേർക്ക് പരിക്കുണ്ട്. ഒരാളുടെ കാലൊടിഞ്ഞ നിലയിലാണെന്ന് അധികൃതർ അറിയിച്ചു. അപകടത്തെത്തുടർന്നു റോഡിൽ ഏറെ സമയം ഗതാഗതം തടസപ്പെട്ടു. ഒന്നര ലക്ഷത്തോളം തക്കാളിയാണു റോഡിൽ വീണത്. അധികൃതരെത്തി ഒരുഭാഗത്തെ തക്കാളി നീക്കിയ ശേഷമാണു ഗതാഗതം പുനഃസ്ഥാപിച്ചത്. യുഎസിൽ ഏറ്റവുമധികം തക്കാളി ഉത്പാദിപ്പിക്കുന്ന സംസ്ഥാനമാണ് കലിഫോർണിയ.
