12 June, 2022 10:19:09 AM
സ്വപ്നഭാഷണം: ഷാജ് കിരണിനെയും ഇബ്രാഹിമിനെയും പോലീസ് ചോദ്യം ചെയ്യും
തിരുവനന്തപുരം: സ്വര്‍ണക്കടത്ത് കേസ് പ്രതി സ്വപ്നാ സുരേഷുമായുള്ള വിവാദ സംഭാഷണത്തിന്‍റെ പശ്ചാത്തലത്തിൽ ഷാജ് കിരണിനെയും സുഹൃത്തും വ്യവസായിയുമായ ഇബ്രാഹിമിനെയും പ്രത്യേക അന്വേഷണ സംഘം ചോദ്യം ചെയ്യാൻ വിളിപ്പിച്ചു. ഗൂഢാലോചന കേസ് അന്വേഷിക്കുന്ന സംഘത്തിലെ എസ്.പി മധുസൂദനൻ ആണ് ഷാജിനെ ഫോണിൽ വിളിച്ചത്. മൊഴിയെടുക്കാൻ ഹാജരാകാൻ ആവശ്യപ്പെടാനായിരുന്നു വിളിച്ചത്. എന്നാൽ ചെന്നൈയിലാണന്നും തിങ്കളാഴ്ചയേ മടങ്ങി വരൂവെന്നും ഷാജ് അറിയിച്ചു.
ചോദ്യം ചെയ്യലുമായി ബന്ധപ്പെട്ട് തിങ്കളാഴ്ച ഇവര്‍ക്ക് നോട്ടീസ് നല്‍കും. സംസ്ഥാന പോലീസ് മേധാവി അനില്‍ കാന്തിന് ഷാജ് കിരണ്‍ പരാതിയുടെ അടിസ്ഥാനത്തിലാണ് ചോദ്യംചെയ്യൽ. സംസ്ഥാന സര്‍ക്കാരിനെതിരേ സ്വപ്ന നടത്തുന്ന ഗൂഢാലോചനയുടെ ഭാഗമാക്കാന്‍ ശ്രമം നടത്തുന്നുവെന്നായിരുന്നു ഷാജിന്‍റെ പരാതി. ഈ പരാതി ഡിജിപി പ്രത്യേക അന്വേഷണ സംഘത്തിന് കൈമാറിയിട്ടുണ്ട്.
