06 December, 2021 08:22:00 PM
900 ജീവനക്കാരെ ഒരു സൂം മീറ്റിംഗിലൂടെ പിരിച്ച് വിട്ട് ബെറ്റർ ഡോട്ട് കോം സിഇഒ
ന്യൂഡൽഹി: 900 ജീവനക്കാരെ ഒരു സൂം മീറ്റിംഗിലൂടെ പിരിച്ചുവിട്ട് ബെറ്റർ ഡോട്ട് കോം സിഇഒ വിശാൽ ഗാർഗ്. ഇന്ത്യയിലെയും അമേരിക്കയിലെയും ജീവനക്കാരാണ് പിരിച്ചുവിടപ്പെട്ടത്. വിശാലിന്‍റെ സൂം കോളിൽ പങ്കെടുത്ത ജീവനക്കാരിൽ ഒരാൾ ഇത് റെക്കോഡ് ചെയ്യുകയും സാമൂഹികമാധ്യമങ്ങളിൽ പങ്കുവെക്കുകയും ചെയ്തു. ഈ വീഡിയോ വ്യാപകമായി പ്രചരിക്കുന്നുണ്ട്. നിരവധിപ്പേരുടെ ജോലി പോയ സൂം കോൾ ഡിസംബർ ഒന്നിനായിരുന്നു നടന്നത്.
"നിങ്ങൾ കേൾക്കാൻ ആഗ്രഹിക്കുന്ന വാർത്തയല്ല ഇത്. ഈ കോളിൽ നിങ്ങൾ ഉൾപ്പെട്ടിട്ടുണ്ടെങ്കിൽ, പിരിച്ചുവിടാൻ ഉദ്ദേശിക്കുന്ന സംഘത്തിൽ നിങ്ങളുമുണ്ട്. നിങ്ങളുടെ ഇവിടുത്തെ ജോലി ഉടൻ അവസാനിക്കുകയാണ്" - ഗാർഗ് വീഡിയോയിൽ പറയുന്നത് കാണാം. തന്‍റെ തൊഴിൽജീവിതത്തിൽ ഇത് രണ്ടാം തവണയാണ് ഇത്തരമൊരു തീരുമാനം എടുക്കുന്നതെന്നും തനിക്ക് ഇത് ചെയ്യാൻ ആഗ്രഹമില്ലെന്നും ഗാർഗ് പറയുന്നുണ്ട്. കഴിഞ്ഞ തവണ ഇത്തരമൊരു പ്രഖ്യാപനം നടത്തിയപ്പോൾ താൻ കരഞ്ഞെന്നും ഗാർഗ് കൂട്ടിച്ചേർക്കുന്നു.
