02 November, 2021 05:02:36 PM
നോ ഹലാൽ പൊളിഞ്ഞു; തുഷാരയും ഭർത്താവ്‌ അജിത്തും അറസ്റ്റിൽ
കൊച്ചി: കാക്കനാട് ഇന്‍ഫോപാര്‍ക്കിനടുത്ത് റസ്റ്ററന്‍റുമായി ബന്ധപ്പെട്ടുണ്ടായ സംഘര്‍ഷത്തില്‍ പ്രതികളായ തുഷാരയും ഭർത്താവ്‌ അജിത്തും അറസ്റ്റിൽ. മതവിദ്വേഷ പ്രചാരണത്തിനാണ് അറസ്റ്റ്. സംഭവത്തിൽ വിഷ്‌ണു ശിവദാസ്‌ (26), എബിൻ ബെൻസ്‌ ആന്‍റണി (22) എന്നിവർ നേരത്തെ അറസ്‌റ്റിലായിരുന്നു.
ചില്‍സേ ഫുഡ് സ്‌പോട്ടിനു സമീപത്തെ പാനിപ്പൂരി സ്റ്റാള്‍ പ്രതികളുടെ നേതൃത്വത്തില്‍ നശിപ്പിച്ചതിനെ ചോദ്യം ചെയ്തതാണ് അക്രമ സംഭവങ്ങളിലേക്കു നയിച്ചത്. തുഷാര തന്‍റെ കടയുടെ മുമ്പില്‍ നോണ്‍ ഹലാല്‍ ബോര്‍ഡ് സ്ഥാപിച്ചതാണ് പ്രശ്നങ്ങള്‍ക്കു കാരണമെന്നു ആദ്യമിവർ നവമാധ്യമങ്ങളിലൂടെ പ്രചരിപ്പിച്ചിരുന്നു. ഈ രീതിയിൽ പലേടത്തും വാർത്തകളും വന്നു.
പിന്നീട് പോലീസ് നടത്തിയ വിശദമായ ആന്വേഷണത്തിലാണ് തുഷാരയുടെ വാദം ശരിയല്ലെന്നും അങ്ങോട്ടാണ് ആക്രമിച്ചതെന്നും വ്യക്തമായത്. തുഷാരക്കെതിരെ പോലീസ് രണ്ടുവട്ടം കേസെടുത്തിരുന്നു. തുഷാരയ്ക്കു മാധ്യമശ്രദ്ധ ലഭിക്കുന്നതിനും കേസിന്‍റെ സുഗമമായ അന്വേഷണം തടസപ്പെടുത്തുന്നതിനും വേണ്ടി മാത്രമായി ഉണ്ടാക്കിയ നുണക്കഥ മാത്രമാണ് നോ ഹലാൽ എന്നു മനസിലായതായും ഇന്‍ഫോപാര്‍ക്ക് പോലീസ് അറിയിച്ചു.
