06 June, 2020 01:09:15 AM
ഒളിവിൽകഴിയുന്ന അധോലോക നേതാവ് ദാവൂദ് ഇബ്രാഹിമിനും ഭാര്യയ്ക്കും കോവിഡ്
കറാച്ചി: പാക്കിസ്ഥാനിൽ ഒളിവിൽകഴിയുന്ന അധോലോക നേതാവ് ദാവൂദ് ഇബ്രാഹിമിനും ഭാര്യ മെഹാജബിൻ ഷെയ്ക്ക് എന്നറിയപ്പെടുന്ന സുബീന സറീനും കോവിഡ്-19 സ്ഥിരീകരിച്ചു. പാക്കിസ്ഥാൻ സർക്കാർ വൃത്തങ്ങളെ ഉദ്ധരിച്ച് സിഎൻഎൻ ആണ് വാർത്ത പുറത്തുവിട്ടത്. ഇരുവരെയും കറാച്ചിയിലെ സൈനിക ആശുപത്രിയിൽ പ്രവേശിപ്പിച്ചിരിക്കുകയാണ്. ദാവൂദിന്‍റെ പഴ്സണൽ ജീവനക്കാരും സുരക്ഷാ ഭടന്മാരും ക്വാറന്‍റൈനിലാണെന്നും റിപ്പോർട്ടിൽ പറയുന്നു.
എന്നാൽ, ദാവൂദും ഭാര്യയും വീട്ടിൽ ക്വാറന്‍റൈനിലാണെന്ന് പാക്കിസ്ഥാൻ രഹസ്യാന്വേഷണ വിഭാഗമായ ഐഎസ്ഐ അറിയിച്ചുവെന്ന് സിഎൻഎൻ പിന്നീടു പറഞ്ഞു. ദാവൂദും ഭാര്യയും സൈനിക ആശുപത്രിയിലാണെന്ന വാർത്ത ഐഎസ്ഐ നിരാകരിക്കുകയും ചെയ്തു. 1993 ലെ മുംബൈ സ്ഫോടന പരന്പരയുടെ മുഖ്യസൂത്രധാരനായ ദാവൂദ് കറാച്ചിയിലാണു കഴിയുന്നതെന്നു കരുതുന്നുവെങ്കിലും പാക് സർക്കാർ ഇക്കാര്യം നിഷേധിക്കുകയാണ്. 2003 ൽ ദാവൂദിനെ ഇന്ത്യയും യുഎസും ആഗോള ഭീകരനായി പ്രഖ്യാപിച്ചിരുന്നു. പാക്കിസ്ഥാനിൽ ഇതുവരെ 89,000 ലേറെപ്പേർക്കാണു കോവിഡ്-19 സ്ഥിരീകരിച്ചത്. 1,800 ആളുകൾ മരിച്ചു.
