07 May, 2020 10:36:43 PM
അമേരിക്കയിൽ കോവിഡ് മരണം 75,000 കടന്നു; 9,82,393 പേർ ചികിത്സയിൽ
വാഷിംഗ്ടണ്‍: അമേരിക്കയിൽ കോവിഡ് 19 ആശങ്കകൾ വർധിക്കുന്നു. ദിനംപ്രതി അമേരിക്കയിൽ കോവിഡ് മരണസംഖ്യ ഉയരുകയാണ്. 75,587 പേരാണ് ഇതുവരെ അമേരിക്കയിൽ കോവിഡ് ബാധിച്ച് മരിച്ചത്. ലോകത്ത് തന്നെ കൂടുതൽ ആളുകൾ കോവിഡ് ബാധിച്ച് മരിച്ചത് അമേരിക്കയിലാണ്. 12,71,644 പേർക്കാണ് അമേരിക്കയിൽ കോവിഡ് സ്ഥിരീകരിച്ചത്. 9,82,393 പേർ ഇപ്പോഴും ചികിത്സയിലാണ്. 2,13,664 പേർ രോഗമുക്തി നേടിയിട്ടുണ്ട്.
അമേരിക്കയിൽ ന്യൂയോർക്ക് നഗരത്തിലാണ് കൂടുതൽ ആളുകൾ കോവിഡ് ബാധിച്ച് മരിച്ചത്. 26,359 പേരാണ് ഇവിടെ മാത്രം മരിച്ചത്. 337,011 പേർക്ക് ന്യൂയോർക്കിൽ കോവിഡ് സ്ഥിരീകരിച്ചു. ന്യൂജഴ്സി (8,818), മിഷിഗൻ (4,250), മാസച്യുസെറ്റ്സ് (4,420), ഇല്ലിനോയി (2,974), കണക്ടിക്കട്ട് (2,718), പെൻസിൽവാനിയ (3,572), കലിഫോർണിയ (2,462) സംസ്ഥാനങ്ങളിലും മരണം കൂടിവരികയാണ്.
