05 October, 2019 02:41:59 PM
ഷാനിമോള്‍ക്കെതിരെ "പൂതന" പരാമര്‍ശം: മാധ്യമസൃഷ്ടിയെന്ന് മന്ത്രി ജി.സുധാകരന്‍
ആലപ്പുഴ: അരൂരിലെ യുഡിഎഫ് സ്ഥാനാർഥി ഷാനിമോൾ ഉസ്മാനെതിരേ 'പൂതന' പ്രയോഗം നടത്തിയിട്ടില്ലെന്ന് മന്ത്രി ജി. സുധാകരൻ. ഷാനിമോൾ തനിക്ക് സഹോദരിയെ പോലെയാണ്. മാധ്യമങ്ങളാണ് അനാവശ്യ വിവാദങ്ങളുണ്ടാക്കുന്നതെന്നും സുധാകരൻ വിശദമാക്കി. വെള്ളിയാഴ്ച തൈക്കാട്ടുശേരിയിലെ കുടുംബ യോഗത്തിലായിരുന്നു മന്ത്രിയുടെ വിവാദ പരാമർശമുണ്ടായതത്രേ. പൂതനമാര്‍ക്ക് ജയിക്കാനുള്ള സ്ഥലമല്ല അരൂർ എന്നും കള്ളം പറഞ്ഞും മുതലക്കണ്ണീര്‍ ഒഴുക്കിയുമാണ് യുഡിഎഫ് ജയിക്കാന്‍ ശ്രമിക്കുന്നതെന്നും മന്ത്രി പറഞ്ഞിരുന്നുവെന്നാണ് റിപ്പോര്‍ട്ടുകള്‍.
അതേസമയം, തനിക്കെതിരായ സുധാകരന്‍റെ പരാമർശം സ്ത്രീ വിരുദ്ധമാണെന്നും ഇക്കാര്യത്തിൽ അതീവ ദുഃഖമുണ്ടെന്നും അരൂരിലെ യുഡിഎഫ് സ്ഥാനാർഥി ഷാനിമോൾ ഉസ്മാൻ പറഞ്ഞു. കൂടുതൽ നടപടികൾ യുഡിഎഫ് നേതാക്കളുമായി ആലോചിച്ച് തീരുമാനിക്കുമെന്നും ഷാനിമോൾ പറഞ്ഞു. സുധാകരനെതിരേ പ്രതിഷേധവുമായി മഹിളാ കോണ്ഗ്രസും രംഗത്തെത്തി. സുധാകരൻ മാപ്പ് പറയണമെന്നും അദ്ദേഹത്തിന്‍റേത് സവർണമേധാവിത്വമാണെന്നും മഹിളാ കോണ്ഗ്രസ് സംസ്ഥാന അധ്യക്ഷ ലതിക സുഭാഷ് പറഞ്ഞു. കോണ്ഗ്രസിന്റെ വനിതാ സ്ഥാനാർഥികൾക്കെതിരേ ഇതിന് മുന്‍പും എൽഡിഎഫ് നേതാക്കൾ സമാനപരാമർശങ്ങൾ നടത്തിയിട്ടുണ്ടെന്നും അവർ വ്യക്തമാക്കി.
